Jańa Zelandııada temeki kontrabandasy úshin 7 jylǵa sottalady
ASTANA. KAZINFORM – Jańa Zelandııa úkimeti temeki ónimderin zańsyz tasymaldaý men satýǵa qatysty jazany kúsheıtýdi kózdeıtin zań jobasyn maquldady.
Jańa Zelandııanyń Densaýlyq saqtaý mınıstri Keısı Kostellonyń málimdeýinshe, zańsyz temeki saýdasy uıymdasqan qylmyspen tyǵyz baılanysty. Bul kóleńkeli naryq zańdy kásipke zalal keltirip qana qoımaı, memleket qazynasyna túsetin salyq túsimderin de azaıtady.
Mınıstrdiń sózinshe, qoldanystaǵy zańnama quqyq qorǵaý organdarynyń zańsyz saýdaǵa qarsy kúresine jetkilikti múmkindik bermeıdi.
Temeki ónimderiniń qaptamasyna qoıylatyn talaptardy buzǵany úshin 2 myń Jańa Zelandııa dollary (shamamen 500 myń teńge) kóleminde aıyppul engizý usynylyp otyr. Óndirýshiler, ımporttaýshylar men dıstrıbıýtorlar úshin aıyppuldyń eń joǵary mólsheri 200 myń dollarǵa (shamamen 5 mln teńge) deıin jetýi múmkin. Al qaptama talaptaryn qasaqana buzǵany úshin qazirgi 50 myń dollardyń ornyna 100 myń dollar kóleminde aıyppul salý kózdelgen.
Sonymen qatar keden jáne aktsızdik zańnamaǵa ózgerister engizý týraly zań jobasy temeki kontrabandasy jáne temeki ónimderine salynatyn arnaıy salyqty tóleýden jaltarǵany úshin bas bostandyǵynan aıyrýdyń eń joǵary merzimin alty aıdan jeti jylǵa deıin uzartýdy usynady.
Jańa aıyppuldar men quqyq buzýshylyqtarǵa qatysty talaptar zańnamaǵa tıisti túzetýler engizilgennen keıin kúshine enedi.
Kostellonyń aıtýynsha, ózgerister temekiniń zańsyz aınalymyna qarsy kúreste Densaýlyq saqtaý mınıstrligi, Keden qyzmeti men polıtsııanyń birlesken jumysyn kúsheıtedi.
Buǵan deıin Qazaqstanda temeki shegetinderdiń úlesi 15 paıyzǵa deıin tómendegeni habarlanǵan bolatyn.
