Jańa Zelandııada taǵy 200 delfın jaǵalaýǵa shyǵyp qaldy
ASTANA. QazAqparat - Jańa Zelandııanyń Ońtústik araly jaǵalaýyna 200-den astam delfın shyǵyp qaldy, dep habarlady Radio New Zealand.
Radıostantsııanyń derekterine sáıkes, tabıǵı resýrstardy qorǵaý departamentiniń qyzmetkeri Maık Oýgl oqıǵa delfınder tobyn akýla shoshytqannan bolýy múmkin ekenin habarlady.
«Delfınniń biriniń denesinen akýla tisiniń izi tabyldy. Ol sondaı úlken emes, kishkentaı jaraqat, biraq jaqynda túskeni baıqalady, osy oqıǵanyń baılanysy bolýy ábden múmkin», - degen Oýgldiń sózin keltirdi radıostansa.
Budan buryn Ońtústik aralda 400-den astam qara grınd-delfın jaǵaǵa shyǵyp qalǵan edi. Kópshiligi qyrylyp, 100-ge jýyǵyn eriktiler qutqaryp qalǵan. Qutqarýshylar qaıyqpen olarǵa ashyq teńizge qaraı durys baǵytty tańdaýǵa kómektesken bolatyn.
Reseı Dúnıejúzilik jabaıy tabıǵat qorynyń (WWF) teńiz baǵdarlamasy basshysy Konstantın Zgýrovskıı budan buryn RIA Novostıge delfınder seısmıkalyq barlaý nemese áskerı kemelerdiń sý asty akýstıkalyq júıeleriniń daýysynan eseńgiregen basshylarynyń artynan erip jaǵaǵa shyǵyp qalýy múmkin ekendigin aıtqan.
Jańa Zelandııada mundaı jaǵdaı jıi oryn alýda. Ǵalymdar onyń áli naqty jaýabyn taba almaýda. Ádette, delfın jaǵaǵa shyǵyp qalsa, ony qutqarýǵa tyrysqan basqalary da jaǵa shyǵyp qalyp jatady.
