Jańa Zelandııada ózen arnasy 9 metrge kóterilip, tótenshe jaǵdaı jarııalandy
ASTANA. QazAqparat - Jańa Zelandııada tolassyz nóserdiń sońy tasqynǵa ulasty. Tabıǵı apatqa baılanysty birqatar aımaqtarda tótenshe jaǵdaı jarııalanǵan. Osy óńir arqyly ótetin Ýonganýı ózeniniń arnasy 9 metrge deıin kóterilip tasyǵan, dep jazady khabar.kz.
Jergilikti azamattyq qorǵanys qyzmeti ókilderiniń málimdeýinshe, aımaqtaǵy júzdegen úıdi sý shaıyp, turǵyndar qaýipsiz jaqqa kóshirildi. Jalpy bıyl mólsherinen tys jańbyr álemniń ondaǵan elderinde sý tasqyny men laı kóshkininiń júrýine alyp keldi.
AQSh, Serbııa, Qytaı, Qyrym, Brazılııa, Avstralııa, Qyrǵyzstan, Qazaqstan, Polsha, Grýzııa, Reseı, Nepal elderinde tolassyz jaýyn-shashynnyń saldary halyqty ábigerge saldy.
Eske sala keteıik, kóktem mezgilinde erigen qardan ózen arnasy tasyp, elimizdiń 5 oblysy sý tasqynynan zardap shekken bolatyn. Al jaz mezgili shyqqaly beri Astana, Almaty, Petropavl óńirinde de mólsherinen tys jaýǵan jańbyrdan qala ishin kólkigen sýǵa basty. Al 9 maýsymda Almatyda bolǵan daýyldyń sońy nóserli jańbyrǵa ulasyp, saldarynan 3 avtokóliktiń ústine tal qulap, elektr jelileri isten shyqqan bolatyn. Jeldiń kúshi sekýndyna 18 metrge jetken. Turǵyn úılerdiń shatyry ushyp, aýlada turǵan kólikterdiń ústine túsken edi. Sondaı-aq sý deńgeıiniń kóterilýinen Medeýden Shymbulaqqa barar joldyń jıeginde eni 4 metrdeı laı kóshkini júrgen.
Aıta keteıik, keshe mólsherinen tys jaýǵan jańbyr kórshi Reseı astanasy Máskeýdi de ábigerge saldy. Bir kúnniń ishinde túsken jaýyn-shashyn mólsheri tipti rekordtyq kórsetkishke jetken. Reseı astanasynyń aýa raıyn boljaý bıýrosynyń málimeti boıynsha, bul 82 jyldan beri bolmaǵan jaǵdaı. Túsken jaýyn-shashyn mólsheri 31 mıllımetrge jetti. Al 1933-shi jyly ylǵaldyń kólemi 23 mıllımetr shamasynda bolǵan eken.
