Jańa Zelandııada nóser jaýyn saldarynan 30 myńnan astam úı jaryqsyz qaldy

ASTANA. KAZINFORM - Jańa Zelandııa aýmaǵynda nóser jaýyn men qatty daýyl saldarynan Soltústik aral boıynda áýe, jerústi jáne teńiz qatynasy buzylyp, 30 myńnan astam úı sharýashylyǵy elektr energııasynsyz qaldy, dep habarlaıdy Anadoly.

Radio New Zealand (RNZ) málimetinshe, qolaısyz aýa raıy Soltústik araldaǵy kúndelikti tirshilikke aıtarlyqtaı kedergi keltirip otyr.

Jańa Zelandııanyń meteorologııalyq qyzmeti — MetService shyǵys jaǵalaýda jeldiń jyldamdyǵy saǵatyna 240 shaqyrymǵa deıin jetkenin, al el astanasy Vellıngtonnyń bıik aımaqtarynda 190 shaqyrymǵa deıin kúsheıgenin habarlady.

Elektr energııasyn taratýǵa jaýapty Powerco kompanııasynyń dereginshe, daýyl saldarynan 30 myńnan astam úı jaryqsyz qalǵan. Aǵashtardyń qulaý qaýpine baılanysty birqatar úıden turǵyndar evakýatsııalanyp, kóptegen ushaq, poıyz jáne parom reısteri toqtatyldy, keıbir avtojoldar jabyldy. Sondaı-aq kóptegen mektepte sabaq ýaqytsha toqtatylǵan.

Air New Zealand qolaısyz aýa raıyna baılanysty Vellıngton, Neıpır jáne Palmerston-Nort áýejaılarynda reısterdiń ýaqytsha toqtatylǵanyn málimdedi.

Bıliktiń habarlaýynsha, tún ishinde tótenshe qyzmetterge júzdegen qońyraý túsken. Qutqarý toptary qulaǵan aǵashtar, sý tasqyny men búlingen joldardyń saldaryn joıý jumystaryn jalǵastyryp jatyr.

Osyǵan deıin Portýgalııadaǵy daýyldyń 16 adamnyń ómirin qıǵany týraly jazdyq.