Jańa Zelandııada qaıyq kıtke soǵylyp, 5 adam kóz jumdy

NUR-SULTAN. QazAqparat – Jańa Zelandııada kıtke soǵylǵan qaıyq aýdarylyp, saldarynan bes adam kóz jumdy, dep habarlaıdy QazAqparat BBC silteme jasap.

Senbi kúni Jańa Zelandııanyń Kaıkoýra qalasynyń mańynda bolǵan apat kezinde bortta on bir adam bolǵan. Qala bıliginiń málimetinshe, 8,5 metrlik qaıyq sý betine shyǵyp kele jatqan kıtpen soqtyǵysqan, sonyń saldarynan adam ólimi tirkeldi. Qaıyq kapıtanyn qosa eseptegende tiri qalǵan alty adam aýrýhanaǵa jetkizildi, medıtsınalyq tekserýden keıin olar aýrýhanaǵa jatýdan bas tartty. Bir adam jeńil jaraqat alǵan. Borttaǵy jolaýshylar qustardy baqylaý úshin álem elderinen jınalǵan týrıst bolýy yqtımal.

Kaıkoýra teńiz álemin tamashalaǵysy keletinder jıi keletin oryndardyń biri. Bunda kıtter men delfınderdi kórsetý úshin týrısterge teńiz saıahattary men tikushaqpen ushý saparlaryn usynatyn kásiporyndar bar.

Foto: www.bbc.com