Jańa Zelandııada 16 jasqa tolmaǵandarǵa áleýmettik jelini paıdalanýǵa tyıym salynbaq
ASTANA. KAZINFORM — Áleýmettik jeliler balalardy zııandy kontentke, túrli tehnologııaǵa táýeldi qylyp, ózderi tótep bere almaıtyn qysymǵa dýshar etedi, dep málimdedi Jańa Zelandııa Premer-mınıstri Krıstofer Lakson. Bul týraly Anadolu agenttigi habarlady.
Jańa Zelandııa úkimeti 16 jasqa tolmaǵan balalardyń áleýmettik jelilerdi paıdalanýyna tyıym salatyn zań jobasyn parlamentke engizýge daıyndalyp jatyr. Qujatta kámeletke tolmaǵandardyń ınternettegi qaýipsizdigin qamtamasyz etý úshin tehnologııalyq kompanııalarǵa birqatar jańa zańnamalyq mindet júkteý de qarastyrylǵan.
Jańa Zelandııa úkimetiniń resmı saıtynda jarııalanǵan Premer-mınıstr Krıstofer Laksonnyń málimdemesine sáıkes, 13-17 jas aralyǵyndaǵy árbir úshinshi jasóspirim kúnine keminde bes saǵatyn áleýmettik jelide ótkizedi.
Lakson áleýmettik jelilerdiń bala psıhıkasy men damýyn tejeıtinin atap ótti. Onyń sózinshe, balalar zııandy kontentterdi kórip, táýeldilikke uryndyratyn tehnologııalardyń jeteginde ketedi. Odan bólek otbasymen qarym-qatynasy, psıhologııalyq jaı-kúıi, uıqysy men oqý úlgerimine kesiri tıedi.
Premer-mınıstr balalardyń áleýmettik jelilerdi paıdalanýyn baqylaýǵa eń aldymen ata-analar jaýapty ekenin aıtty. Alaıda onyń aıtýynsha, áleýmettik platformalar da óz jaýapkershiligin sezinip, bul máselege ortaq mindet retinde qaraýǵa tıis.
Osy rette úkimet Parlamentke «Onlaın qaýipsizdik — eń tómengi jas shegi jáne balalar qaýipsizdigine tónetin qaterdi baǵalaý týraly» zań jobasyn engizbek.
Lakson barlyq balany áleýmettik jelilerden tolyqtaı shekteý múmkin emes ekenin moıyndady. Ol, sondaı-aq, jelige tirkelý kezindegi eń tómengi jas shegin engizý qoldanýshylardyń minez-qulqyna áser etip jatqanyn Avstralııadan alynǵan alǵashqy derekterden baıqaýǵa bolatynyn atap ótti.
Zań jobasynyń negizgi erejeleri
Zań jobasynda Instagram, TikTok, Snapchat jáne Facebook sekildi platformalarǵa óz qoldanýshylarynyń 16 jasqa tolǵanyna kóz jetkizý mindeti júktelmek.
Platformalar paıdalanýshynyń jasyn anyqtaý úshin túrli tásildi qoldana alady. Atap aıtqanda, akkaýnttaǵy málimetterdi tekserý, bet-álpetin taldaý arqyly jasyn anyqtaý, tsıfrlyq jeke kýálik nemese resmı qujattardy paıdalaný múmkindigi qarastyrylǵan.
Zańda belgilengen talaptardy oryndamaǵan kompanııalarǵa jalpy kirisiniń 10 paıyzyna deıin aıyppul qarastyrylǵan.
Zań jobasy jańa tehnologııalarǵa, sonyń ishinde jasandy ıntellekt arqyly jumys isteıtin tsıfrlyq suhbattasý platformalaryna qatysty talaptardy da kúsheıtpek.
Búginde kámeletke tolmaǵandardyń áleýmettik jelilerdi paıdalaný máselesi kóptegen elde ózekti máselege aınaldy. Qazirdiń ózinde 20-ǵa jýyq memleket balalardyń áleýmettik platformalarǵa qoljetimdiligin shekteý týraly josparyn jarııalady.
Áleýmettik jelilerdi paıdalanýǵa jas shekteýin engizgen elderdiń qatarynda Aýstralııa, Qytaı, Brazılııa, Indonezııa jáne Malaızııa bar. Eýropalyq odaq ta osy baǵytta tıisti sharalar qabyldaýǵa nıetti ekenin málimdedi.
Buǵan deıin Frantsııada 15 jasqa tolmaǵan balalardyń áleýmettik jelilerdi paıdalanýyna tyıym salý týraly bastama Konstıtýtsııaǵa qaıshy dep tanylǵan bolatyn.
Aqzat Jıenalına
