Jańa Zelandııa turǵyny quny 19 myń dollar Faberje jumyrtqasyn jutyp qoıdy

ASTANA. KAZINFORM — Jańa Zelandııa polıtsııasy zergerlik dúkenniń tutynýshysyn 33 myń jańazelandııalyq dollar (shamamen 19 myń AQSh dollary) turatyn Faberje alqasyn urlamaq bolǵany úshin tutqyndady, dep habarlaıdy DW aqparat agenttigi. 

Dúken qyzmetkerleri esimi jarııalanbaǵan 32 jastaǵy er adamnyń Oklendtegi dúkende jumyrtqa pishindi kýlondy jutyp qoıǵanyn kórdi.

Tutqyndaǵannan keıin ol medıtsınalyq tekserýden ótti. Polıtsııa endi alqanyń tabıǵı jolmen shyǵýyn kútip jatyr. Qazirgi kezde ol tárkilengen joq.

Polıtsııanyń aıtýynsha, endi barlyǵy ýaqytqa jáne kúdiktiniń as qorytý júıesine baılanysty.

Shekteýli serııadaǵy «Segizaıaq» dep atalatyn kýlon Faberje jumyrtqasy pishininde jasalǵan jáne ol 1983 jylǵy Djeıms Bond fılminen ıdeıa alǵan. Sıýjette jalǵan Faberje jumyrtqasyn qoldanyp zergerlik buıymdardy kontrabandalyq jolmen tasymaldaý operatsııasy mańyzdy ról atqarady.

Dúken saıtyndaǵy sıpattamaǵa sáıkes, urlanǵan jumyrtqanyń bıiktigi 8,4 sm, ol altynnan jasalǵan, jasyl emalmen qaptalǵan jáne 183 gaýhar tas pen eki jaqutpen bezendirilgen. Barlyǵy 50 dana jasalǵan.

— Jumyrtqa ashylady, ishinde aq gaýhar sorǵyshtary men qara gaýhar kózderi bar 18 karattyq sary altynnan jasalǵan segizaıaq jasyrynǵan, — delingen sıpattamada.

Alqany jutyp qoıǵan er adam 8 jeltoqsanda sot aldynda jaýap berýi tıis.

Budan buryn Parıjdegi Lývrge ury túsip, Napoleonnyń áshekeıleri qoldy bolǵanyn jazǵan edik. Keıinnen urlanǵan áshekeıler saqtandyrylmaǵan bolyp shyqty.