Jańa Zelandııa tabıǵı apattardan zardap shekkenderge qarjylaı kómekti toqtatýy múmkin

ASTANA. KAZINFORM — Jańa Zelandııadaǵy aýa raıynyń túrli qubylystary turǵyn úıdi qorǵaý boıynsha memlekettik saıasatyn qaıta qarastyrýdy talap etedi, dep habarlaıdy AZERTADJ.

Klımattyń ózgerýimen baılanysty ekstremaldy aýa raıy jaǵdaılary kúsheıip, jıilep bara jatqandyqtan, Jańa Zelandııa úkimeti sońǵy jyldary mıllıardtaǵan dollar jumsap, apattan keıin turǵyn úıdi satyp alýǵa qatysyp kelgen.

Qazir Jańa Zelandııa úkimeti klımattyń ózgerýiniń saldarymen kúres baǵdarlamasyn ázirleý aıasynda, sel men topan sý saldarynan zardap shekken turǵyndarǵa qarjylyq kómek kórsetý tetigin toqtatý múmkindigin qarastyryp otyr.

— Úkimet turǵyndardy osylaısha únemi qutqaryp otyra almaıdy, — dep málimdedi osy aptada Jańa Zelandııanyń premer‑mınıstri Krıstofer Lıýkson memlekettik Radio New Zealand radıostantsııasyna bergen suhbatynda, dep jazady Reuters.

Ol kezde Ońtústik araldyń keıbir aımaqtary osy aı ishindegi topan sýdyń saldaryn joıý jumystaryn bastaǵan edi. Jergilikti bılik málimeti boıynsha, shamamen 800 úı zardap shekken. Sársenbi kúni úkimet apattan zardap shekken fermerler, kásipkerler men orman sharýashylyǵy ıeleri úshin 356 700 dollar kóleminde ótemaqy tólenetinin jarııalady.

Climate Sigma júrgizgen zertteýge sáıkes, 2060 jylǵa deıin quny shamamen 7,4 mıllıard dollar bolatyn keminde 14 500 úı joıqyn sý tasqynyna ushyraýy múmkin — bul jylyna orta eseppen 300–400 úıdiń zardap shegýi yqtımal degen sóz.

Qarjylaı kómekti toqtatý – bul 20 jylǵa sozylatyn ótpeli kezeńdi qamtıtyn saıasat. Onyń maqsaty – turǵyndardyń memleketten kómekke ıek artýdy birtindep doǵaryp, naryqtaǵy baǵa men kútýlerdi jańa jaǵdaıǵa beıimdeýine múmkindik berý.

Jańa Zelandııa men Aýstralııa saıasatkerleri, zertteýshileri jáne jyljymaıtyn múlik jónindegi sarapshylar turmystyq úı satyp alýshylar klımattyq ózgeristermen baılanysty táýekelderdi úılerdiń baǵasyna engizbeıtinin burynnan eskertedi. Tabıǵat qorǵaý mınıstrliginiń esepte usynylǵandaı, turǵyn úıdi satyp alý nemese sol jerde turý týraly sheshim qabyldaǵan kezde, úıdi apat yqtımaldyǵy turǵysynan zerttep, qosymsha aqparatty usyný qajettigi, sondaı-aq sheshimniń saldarynan túsetin shyǵyndardy óz moınyna alatyndyǵyn túsiný mańyzdy dep kórsetilgen.

Buǵan deıin Jańa Zelandııa úkimeti 2034 jylǵa qaraı halyqaralyq bilim berý naryǵyn eki esege ulǵaıtýdy josparlap otyrǵanyn habarlaǵan edik.