Jańa Zelandııa sheteldik stýdentter sanyn eki ese arttyrmaq

ASTANA. KAZINFORM — Jańa Zelandııa úkimeti 2034 jylǵa qaraı halyqaralyq bilim berý naryǵyn eki esege ulǵaıtýdy josparlap otyr, dep jazady AZERTADJ.

Eldiń bilim berý mınıstri Erıka Stenfordtyń aıtýynsha, 2023 jyldan bastap sheteldik stýdentter sany turaqty túrde ósip keledi, sondyqtan úkimet bul ósimdi odan ári jedeldetip, 2034 jylǵa qaraı 4,32 mıllıard dollar kóleminde paıda alǵysy keledi.

Bul málimdeme sheteldik stýdentter úshin tanymal baǵyttar — Aýstralııa men AQSh ózderindegi sheteldik stýdentter sanyn qysqartýǵa nıet bildirgen tusta aıtyldy. Al basqa elderdiń ýnıversıtetteri bul shekteýlerdi óz paıdasyna paıdalanýǵa tyrysyp jatyr.

— Qysqa merzim ishinde Jańa Zelandııanyń Bilim mınıstrligi óz nasıhat jumystaryn eń úlken ósim áleýeti bar naryqtarǵa baǵyttaıdy, — dedi Stenford.

Qazirgi ýaqytta Jańa Zelandııanyń halyqaralyq bilim berý naryǵy ekonomıkaǵa jyl saıyn 2,15 mıllıard dollar tabys ákelip otyr. Úkimet 2024 jyly 83 700 bolǵan sheteldik stýdentter sanyn 2027 jyly 105 myńǵa, al 2034 jyly 119 myńǵa jetkizýdi kózdeıdi. Osylaısha, bul salanyń ekonomıkaǵa qosatyn úlesin eki eseleý josparlanyp otyr.

Sheteldik stýdentterdi tartý úshin Jańa Zelandııa úkimeti:

• ruqsat etilgen sheteldik stýdentter úshin jartylaı jumys isteý saǵattaryn arttyrýdy,

• sondaı-aq bekitilgen almasý nemese shetelde oqý baǵdarlamalaryna qatysatyn JOO stýdentteriniń barlyǵyna jumys isteý quqyǵyn berýdi kózdep otyr.

Ekonomıkalyq ósimi baıaýlaǵan Jańa Zelandııa úshin bul qadam — tsıfrlyq kóshpendilerdi (digital nomads) tartýǵa jáne sheteldik ınvestıtsııalardy arttyrýǵa baǵyttalǵan birqatar reformadan keıingi ekonomıkany qalpyna keltirý sharalarynyń biri bolyp otyr.

Eske salsaq, 23 mamyr kúni Tramp ákimshiligi Garvardty sheteldik stýdentterdi oqytý quqyǵynan aıyrdy.

Osydan keıin Ǵylym jáne joǵary bilim mınıstri Saıasat Nurbek Garvard ýnıversıtetinde bilim alyp jatqan otandastarymyzdyń jaǵdaıyna baılanysty pikir bildirdi.