Jańa Zelandııa Beıbitshilik keńesine qosylýdan bas tartty
ASTANA. KAZINFORM — Jańa Zelandııa úkimeti AQSh prezıdenti Donald Tramptyń Gaza Beıbitshilik keńesine qosylý týraly usynysyn qabyldamady. Premer-mınıstr Krıstofer Laksonnyń bul málimdemesin Stuff jańalyqtar portaly jarııalady, dep habarlaıdy TASS.
— Jańa Zelandııa úkimeti prezıdent Tramptyń shaqyrýyn qarastyryp, Beıbitshilik Keńesiniń quramyna kirmeýge sheshim qabyldady, — dedi Lakson.
Jańa Zelandııanyń Syrtqy ister mınıstri Ýınston Peters eldiń uıymdy qoldaıtynyn, biraq Beıbitshilik keńesine qosylmaıtynyn basa aıtty.
— Birqatar memleket keńes jumysyna qatysýǵa nıetterin bildirdi, al Jańa Zelandııa aıtarlyqtaı úles qospaıdy. Sonymen qatar, bizge osy jańa qurylymnyń qazir de, bolashaqta da ókilettikteri týraly naqtylyq qajet, — dedi ol.
Qańtardyń 22-si kúni Davostaǵy Dúnıejúzilik ekonomıkalyq forým aıasynda 19 eldiń ókilderi Gaza sektoryn beıbit retteý aıasynda qurylǵan Beıbitshilik keńesiniń jarǵysyna qol qoıdy. Tramp uıymǵa basqa elderdiń de qosylǵanyn habarlady. Beıbitshilik keńesi Gaza sektoryn basqarý úshin qurylǵan, biraq ol basqa aımaqtardaǵy qaqtyǵystardyń aldyn alý jáne sheshýge de qatysady dep josparlanǵan.
Buǵan deıin Beıbitshilik keńesi Trampqa Gaza sektoryna qatysty basym ókilettik beretini týraly jazdyq.
