Jańa zaýyttar, joldar men myńdaǵan páter: óńirlerdegi basty jańalyqtar
ASTANA. KAZINFORM — Ótken aptada Qazaqstan óńirlerinde jańa óndiris oryndary ashylyp, joldar jańǵyrtyldy, júzdegen otbasy baspanaly bolyp, sport keshenderi paıdalanýǵa berildi. Bul týraly Úkimettiń baspasóz qyzmeti málim etti.
Jańa zaýyttar, joldar men myńdaǵan páter: óńirlerdegi basty jańalyqtar
Elimizdiń óńirlerinde Memleket basshysy Qasym-Jomart Toqaevtyń ónerkásipti damytýǵa, ınfraqurylymdy jańǵyrtýǵa jáne azamattardyń ómir súrý sapasyn arttyrýǵa baǵyttalǵan tapsyrmalaryn júzege asyrý jumystary jalǵasýda. Ótken aptada birneshe oblysta jańa óndiris oryndary iske qosylyp, respýblıkalyq mańyzy bar avtomobıl jolyn jańǵyrtý jumystary aıaqtaldy, turǵyn úıler paıdalanýǵa berildi. Sonymen qatar sport ınfraqurylymy keńeıtilip, qoǵamdyq oryndar abattandyryldy.
Ónerkásip jáne óńdeý
Jetisý oblysynyń Alakól aýdanyna qarasty Ekpindi aýylynda aıyna 1,8 myń tonnaǵa deıin ósimdik maıyn óndiretin kásiporyn iske qosyldy. «New Silver Central Asia Grain & Oil» JShS-niń jobasynda jergilikti óndirýshiler aýyl sharýashylyǵy shıkizatyn óńdeıdi. Investıtsııa kólemi 61 mln teńgeden asyp jyǵyldy, turaqty jumys oryndary ashyldy. Jańa óndiris maıly daqyldardy óńdeý kólemin ulǵaıtyp, jergilikti sharýalar úshin qosymsha ótkizý naryǵyn qalyptastyrýǵa múmkindik beredi.
Almaty oblysynyń Іle aýdanyna qarasty M.Túımebaev aýylynda jylyna 400 tonnaǵa deıin balyq óndirýge eseptelgen «Baqyt» balyq ósirý kásiporny ashyldy. Investıtsııa kólemi 500 mln teńgeni qurady. Sharýashylyq arnaıy torly qorshaýlarda balyq ósirýmen qatar, balyq sharýashylyǵyna arnalǵan torly qurylymdar men qosalqy bólshekter shyǵarady. Kásiporyn qazirdiń ózinde 100 tonnadan astam balyq óndirip otyr. Aldaǵy ýaqytta óndiris kólemin jylyna 400 tonnaǵa deıin jetkizý josparlanǵan. Ónim Qazaqstannyń alty óńirindegi sharýashylyqtarǵa jetkiziledi. Óndiristi keńeıtip, jumys oryndarynyń sanyn 15-ten 45–50-ge deıin arttyrý kózdelgen.
Abaı oblysynyń Semeı qalasynda «Tehnoavıa — Qazaqstan» kompanııasy arnaıy aıaq kıim óndirisin iske qosty. Jańa óndiris jumys istep turǵan kásiporynnyń bazasynda ashyldy. Munda 2023 jyldan beri arnaıy jáne korporatıvtik kıim shyǵarylady. Tigin óndirisiniń qýaty jylyna 160 myń buıymdy quraıdy, ónimniń shamamen 85%-y eksportqa jóneltiledi. Jańa aıaq kıim fabrıkasynda 30-dan astam jumys orny ashyldy. Kompanııa fırmalyq saýda núktesin de ashyp, óńirdiń alty iri kásipornymen yntymaqtastyq týraly memorandýmdarǵa qol qoıdy.
Kólik ınfraqurylymy
Shyǵys Qazaqstan oblysynda respýblıkalyq mańyzy bar «Óskemen — Altaı — Úlken Naryn — Katonqaraǵaı — Rahman qaınary» avtomobıl jolynyń 437–450 shaqyrym aralyǵyndaǵy 13 shaqyrymdyq ýchaskesin jańǵyrtý aıaqtaldy. Joba 2025–2026 jyldary júzege asyryldy. Jańartylǵan ýchaskege jańa asfalt tóselip, 17 sý burý naýasy men úsh sý ótkizgish qubyr salyndy, jol qaýipsizdigi elementteri ornatyldy. Jańǵyrtý jumystary Katonqaraǵaı aýdany eldi mekenderiniń kólik qatynasyn jaqsartyp, Shyǵys Qazaqstannyń týrıstik nysandaryna jetýdi jeńildetedi.
Turǵyn úı qurylysy jáne baspanamen qamtý
Qyzylorda qalasynda Syrdarııanyń sol jaǵalaýynda jalpy aýdany 12 myń sharshy metr bolatyn, 168 páterli kópqabatty turǵyn úıler paıdalanýǵa berildi. Páter kiltteri baspana kezeginde turǵan azamattarǵa tabystaldy. Sońǵy tórt jylda óńirde kezekte turǵan azamattarǵa 7,5 myńnan astam páter berilip, 30 myńnan astam adamnyń turǵyn úı jaǵdaıy jaqsardy. 2026 jyldyń sońyna deıin taǵy 2 myńǵa jýyq páterdi paıdalanýǵa berý josparlanyp otyr.
Batys Qazaqstan oblysynyń Syrym aýdanyna qarasty Jympıty aýylynda 72 otbasy jańa páterge ıe boldy. Jalǵyz baspanasy apatty dep tanylǵan azamattar úshin úsh qabatty eki turǵyn úı salyndy. Jyl sońyna deıin óńirde osy sanattaǵy baspana kezeginde turǵan azamattardyń jartysyn turǵyn úımen qamtý josparlanyp otyr.
Shymkent qalasynyń Bozaryq, Aqjaıyq jáne Asar-2 shaǵynaýdandarynda taǵy 30 otbasyǵa páter kilti tabystaldy. Baspanany «2-10-20» jáne «5-10-20» jeńildetilgen turǵyn úı baǵdarlamalarynyń qatysýshylary aldy. Olardyń qatarynda kópbalaly otbasylar, múgedektigi bar azamattar, tolyq emes otbasylar jáne bıýdjettik uıymdardyń qyzmetkerleri bar.
Sport ınfraqurylymy jáne abattandyrý
Jetisý oblysynyń Alakól aýdanyna qarasty Qabanbaı aýylynda aýdany 2 myń sharshy metrden asatyn sport kesheni ashyldy. Nysanda oıyn sport túrlerine, boksqa, kúreske jáne jalpy dene daıyndyǵyna arnalǵan tórt mamandandyrylǵan zal bar. Munda bir mezgilde 80 bala jattyǵa alady. Jalpy, 300-ge jýyq jasóspirimdi sportpen qamtý josparlanǵan. Oblys qurylǵannan beri óńirde 40 jańa sport nysany paıdalanýǵa berildi, onyń jeteýi Alakól aýdanynda ornalasqan.
Túrkistan oblysynyń Sozaq aýdanyna qarasty Jýantóbe aýylynda jańa sport kesheni ashyldy. Ǵımaratta boks jáne kúres zaldary, jattyǵý zaly, medıtsınalyq kabınet pen jattyqtyrýshylarǵa arnalǵan bólmeler bar. Nysannyń qurylysy 2026 jyldyń mamyrynda bastalyp, oblystyq jáne aýdandyq bıýdjet qarajaty esebinen júrgizildi.
