Jańa zańnamalyq normalar parlamenttik oppozıtsııaǵa kepildik beredi - Máýlen Áshimbaev

NUR-SULTAN. QazAqparat - QR Parlamenti Senatynyń Tóraǵasy Máýlen Áshimbaev parlamenttik oppozıtsııaǵa kepildik beretin zańnamaǵa qatysty pikir bildirdi, dep habarlaıdy QazAqparat tilshisi.

«Prezıdent Ulttyq qoǵamdyq senim keńesiniń ekinshi otyrysynda birqatar saıası reformalar usynǵanyn bilesizder. Búgin biz sonyń aıasynda ázirlengen mańyzdy eki zań jobasyn qabyldap otyrmyz. Soǵan sáıkes, elimizde demokratııalyq úrdisterdi ary qaraı damytý maqsatynda – qoldanystaǵy zańnamaǵa «parlamenttik kópshilik» jáne «parlamenttik oppozıtsııa» uǵymdary kirgizilip otyr», - dep toqtaldy M. Áshimbaev Senattyń jalpy otyrysynda.

Osy oraıda ol zańnamalyq normalar parlamenttik oppozıtsııaǵa kepildik beretinin atap ótti.

«Zańmen Májiliske saılanatyn parlamenttik oppozıtsııanyń ókilettikteri jáne olardyń jumysyn qamtamasyz etý tetikteri naqty aıqyndaldy. Memleket basshysynyń usynysymen qabyldanǵan jańa zańnamalyq normalar elimizde parlamenttik oppozıtsııaǵa kepildik beredi, sondaı-aq Qazaqstandaǵy kásibı parlamentarızmniń jańa kezeńine jol ashady dep senemiz», - dedi Senat Tóraǵasy.

Budan buryn habarlanǵandaı, búgin Senatyń jalpy otyrysynda «QR Parlamenti jáne onyń depýtattarynyń mártebesi týraly» Konstıtýtsııalyq zańyna tolyqtyrýlar engizý týraly» Konstıtýtsııalyq zańy, sondaı-aq «QR Parlamentiniń komıtetteri men komıssııalary týraly» Zańyna parlamenttik oppozıtsııa máseleleri boıynsha ózgeris pen tolyqtyrýlar engizý týraly» Zańy qabyldandy.