Jańa zańnamalyq normalarda balalardy ata-analarynan tartyp alý máselesi qarastyrylmaǵan - depýtat
ASTANA. KAZINFORM – Jańa zańnamalyq normalarda balalardy ata-analarynan tartyp alý máselesi qarastyrylmaǵan. Bul týraly Májilis depýtaty Juldyz Súleımenova aıtty.
Búgin Senattyń jalpy otyrysynda áıelderdiń quqyqtary men balalardyń qaýipsizdigin qamtamasyz etý týraly zańy qaralyp, maquldandy.
Talqylaý kezinde senator Ásem Rahmetova qazir atalǵan zańǵa qatysty áleýmettik jelilerde túrli qaýeset tarap jatqanyn aıtty.
«Atalǵan qujat aıasynda balalardy otbasynan tartyp alý baǵytynda ókiletti organnyń quzyreti shekten tys kúsheıtilip jatyr degen birqatar azamattyń ýáji shyndyqqa janasa ma?», - dep surady Á. Rahmetova.
Bul suraqqa qatysty zańǵa bastamashylyq jasaǵandar atynan Májilis depýtaty Juldyz Súleımenova túsinik berdi.
«Búgin talqylaýǵa usynylǵan zańdar Májilistiń depýtattarynyń bastamasymen ázirlendi. Bul suraqtaǵy paıymdar shyndyqqa janaspaıtynyn aıtqym keledi. Balalardy ata-analardan tartyp alýǵa qatysty toqtalsaq, eń basynan ondaı normalar qarastyrylmady jáne talqylaý kezinde tipten aıtylmady. Muny taǵy basa atap ótkim keledi. Qazir áleýmettik jelilerde qoǵamdastyq, onyń ishinde halyqaralyq bolsyn, qazaqstandyq sarapshylar qoǵamdastyǵy bul zańdy kópten kútip otyrǵanyn atap ótti. Degenmen, destrýktıvti keıbir paıymdar arqyly jalǵan aqparat taratyp otyr. Sondyqtan aıtylǵan suraqtyń bári jalǵan, shyndyqqa múldem janaspaıdy. Feık aqparat ekenin atap ótkim keledi», - dedi J. Súleımenova.
Onyń aıtýynsha, zańdar qoǵamnyń eń osal sanaty sanalatyn áıelder men balalardyń quqyǵyn qorǵaýǵa baǵyttalǵan.
«Bul zań qoǵam kópten kútken barlyq suranysyna saı, halyqtyń ıgiligine qyzmet etetin zań bolady. Eshqandaı halyqaralyq uıymdardyń nusqaýlyǵymen jasalǵan joq. Sony atap ótkim keledi. Bizdiń balalarymyzǵa, ata-analarymyzǵa qaıshy keletin birde-bir norma joq ekenin atap ótkimiz keledi. Senatta 1 aıdan asa ýaqyt talqylandy», - dedi Májilis depýtaty.
