Jańa zańdy qabyldaýdyń maqsaty - kásipodaqtardyń rólin kúsheıtý
ASTANA. 11 qazan. QazAqparat - Jańa redaktsııadaǵy «Kásiptik odaqtar týraly» zań jobasy Parlament Májilisiniń qaraýyna kelip tústi. Bul zań jobasy boıynsha qorytyndy ázirleý mindeti Májilistiń Áleýmettik-mádenı damý komıtetine júkteledi.
«Kásiptik odaqtar týraly» Qazaqstan Respýblıkasy Zańynyń jańa redaktsııadaǵy jobasy Memleket basshysynyń 2012 jylǵy 10 shildedegi «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna 20 qadam» baǵdarlamalyq maqalasynda, Qazaqstan Respýblıkasy Prezıdentiniń «Qazaqstan-2050» strategııasy: qalyptasqan memlekettiń jańa saıası baǵyty» atty Qazaqstan halqyna Joldaýynda bergen tapsyrmalaryn oryndaý maqsatynda ázirlengen.
Memleket basshysy baǵdarlamalyq maqalasynda 1993 jyly qabyldanǵan qoldanystaǵy «Kásiptik odaqtar týraly» Qazaqstan Respýblıkasynyń Zańynda áleýmettik áriptestik týraly, ujymdyq sharttardy jasasý men oryndaý tetikteri týraly túsiniktiń joq ekenin atap ótti, sonyń saldarynan Qazaqstandaǵy kásipodaq ınstıtýttary eńbek daýlarynyń aldyn alý jáne sheshýdiń tıimdi quraldarynyń rólin ár kezderi birdeı atqara almaı kele jatqandyǵyn jáne qazir kásipodaqtar qozǵalysyn jańǵyrtý jóninde batyl qadamdarǵa barý qajettiligin atap kórsetti.
Ústimizdegi jyly 2 qyrkúıek kúni besinshi shaqyrylymdaǵy Parlamenttiń úshinshi sessııasyn saltanatty ashqan kezde Qazaqstan Prezıdenti Nursultan Nazarbaev: «Áleýmettik jańǵyrý eńbek qatynastary mádenıetin arttyrýdy talap etedi. Sondyqtan qazaqstandyq kásipodaq qozǵalysyn jańǵyrtý qarqyndyraq júrýi tıis. Úshinshi sessııa jumysy barysynda «Kásiptik odaqtar týraly» jańa zań qabyldaý qajet» degen bolatyn.
Kásipodaq qyzmetine taldaýdyń nátıjesinde olardyń qyzmetinde birqatar kemshilikterdiń bary anyqtaldy. Atap aıtqanda, bul - kásipodaq qyzmetinde biryńǵaı saıasattyń, respýblıkalyq birlestiktiń salalyq, óńirlik jáne jergilikti kásiptik odaqtarmen júıeli jumysynyń, kásipodaqtardyń jáne onyń músheleriniń qabyldaǵan sheshimderi úshin jaýapkershiligi, kásipodaqtardyń jarǵysyna biryńǵaı talaptardyń jáne zań júzinde belgilengen quqyqtar men mindetterdiń joqtyǵy.
Osyǵan oraı, Qazaqstan jurtshylyǵynyń áleýmettik-ekonomıkalyq jaǵdaıy, qazirgi kezdegi quqyqtyq ahýal kásiptik odaqtar týraly zańnamany odan ári jetildirýdi qajet etedi.
Zań jobasy qyzmetkerlerdiń múddelerin bildirý jáne qorǵaý boıynsha kásipodaq uıymdary qyzmetiniń tıimdiligin arttyrýǵa, áleýmettik-eńbek daýlarynyń aldyn alýǵa baǵyttalǵan.
Zań jobasynyń negizgi mindeti kásipodaqtardyń qyzmetin áleýmettik áriptestiktiń árbir: respýblıkalyq, salalyq, óńirlik jáne kásiporyn deńgeıinde qaýymdastyq negizinde qalyptastyrý bolyp tabylady. Negizinen, kásipodaqtardyń rólin kúsheıtý, olardyń qyzmetiniń tıimdiligin arttyrý Qazaqstan Respýblıkasynda áleýmettik áriptestiktiń damýyna tıimdi yqpal etedi.
Úkimettiń zań jobasyna bergen bergen túsindirmesinde zań jobasyn qabyldaý quqyqtyq jáne áleýmettik-ekonomıkalyq keri saldardyń týyndaýyna ákep soqtyrmaıtyny atap ótilgen jáne ol respýblıkalyq jáne jergilikti bıýdjetten qosymsha qarjy shyǵyndaryn qajet etpeıdi.
Zań jobasy jumys berýshiler men qyzmetkerlerdiń respýblıkalyq birlestikteriniń (Qazaqstan Respýblıkasynyń Kásipodaqtar federatsııasy, Qazaqstandaǵy Eńbek konfederatsııasy, Qazaqstannyń erikti kásipodaqtar konfederatsııasy, «Atameken odaǵy» QUEP jáne basqalar) qatysýymen ázirlendi.
Zań jobasynda jarǵylyq maqsattarǵa qol jetkizýge qyzmet etetindikten, kásipodaqtardyń óndiristik jáne sharýashylyq qyzmetti júzege asyrýǵa quqyǵy bolatyny qarastyrylýda.
Zań jobasynda Qazaqstan Respýblıkasynyń kásipodaqtar týraly zańnamasyn buzǵan jeke jáne zańdy tulǵalar Qazaqstan Respýblıkasynyń zańdaryna sáıkes jaýapkershilikke tartylatyny kózdelgen.
Osy Zań jobasy qabyldanyp, qoldanysqa engizilgen kúnnen bastap kásipodaqtar bir jyl ishinde ózderiniń uıymdyq qurylymdaryna jáne quryltaı qujattaryna tıisti ózgerister engizýge mindetti ekeni jazylǵan.
Osy zań jobasy azamattardyń birlesý bostandyǵyna konstıtýtsııalyq quqyǵyn iske asyrýyna, kásiptik odaqtardy qurýǵa, olardyń qyzmetine, olardy qaıta uıymdastyrýǵa jáne taratýǵa baılanysty týyndaıtyn qoǵamdyq qatynastyrdy retteýge baǵyttalǵan.
Zań jobasy jeti taraýdan, 35 baptan turady.
