Jańa zań jobasynda elge oralǵan qazaqtardyń shaǵyn kásipkerligin salyqtan bosatý sharasy qarastyrylsa ıgi - Q. Sádýaqasov
áýirdiń 15-i. QazAqparat /Qanat Mámetqazyuly/ - Jańa zań jobasynda elge oralǵan qazaqtardyń shaǵyn kásipkerligin salyqtan bosatý sharasy qarastyrylsa ıgi.
Búgin QR Parlamenti Májilisinde «Qazaqstannyń kóshi-qon zańnamasy: jetildirý joldary» taqyrybynda ótken dóńgelek ústel barysynda depýtat Qaırat Sádýaqasov osylaı málim etti, dep habarlaıdy QazAqparat.
«Jańa Qazaqstan» depýtattyq tobynyń jetekshisi Qaırat Sádýaqasovtyń aıtýynsha, Otanyna oralǵan etnıkalyq qazaqtarǵa memleket tarapynan jasalatyn jeńildikter jańa zań jobasynda barynsha aıqyn kórinis tabýy qajet. «Atap aıtqanda, bundaı jeńildikterdiń qatarynda salyqtyq jeńildikter de bolýy shart. Máselen, oralman jumysqa ornalasqanda onyń eńbekaqysynan alynatyn jeke tabys salyǵynan bosatýdy qarastyrǵan jón. Bul jumys berýshiniń paıdasynan sheshimin tapsa, olardy yntalandyra túsetini de sózsiz», dedi depýtat.
Bunymen qosa Q. Sádýaqasov elge oralǵan qazaqtardyń shaǵyn kásipkerligin salyqtan bosatý nemese olarǵa salynatyn salyq mólsherin tómendetý máselesin qarastyrý qajettigin de atap ótti. Onyń paıymdaýynsha, kóship kelýshi oralmandar úshin qarastyrylatyn bundaı jeńildikter úsh jyl merzimge belgilense quba-qup bolar edi. Óıtkeni, atalmysh jeńildikter qandastarymyzdyń bizdiń qoǵamǵa shapshań beıimdelýine, jeke kásibin qalyptastyrýyna úlken septigin tıgizetini sózsiz.
