Jańa zań jobasyna sáıkes kólik tizginin ustaǵan múgedek jandarǵa toqtaýǵa jáne turaqtanýǵa tyıym salatyn jol belgileri qoldanylmaıdy
ASTANA. 14 aqpan. QazAqparat - Qoǵamnyń qazirgi damý kezeńinde múmkindigi shekteýli adamdardy qoǵamǵa beıimdeý memlekettiń áleýmettik saıasatynyń negizgi mindeti bolyp tabylady.
Qoǵamda múgedekterdiń problemalaryn belgileý jáne ony sheshýde halyqaralyq normalarǵa sáıkes túbegeıli ózgerister jasalýda.
Osyǵan baılanysty, ІІM-niń Jol polıtsııasy komıteti «Jol júrisi týraly» zań jobasynda osy sanattaǵy azamattarǵa qatysty birqatar basymdyqtar qarastyrdy.
«Zań jobasynda múmkindigi shekteýli jandarǵa, sonyń ishinde tirek-qımyl apparaty buzylǵan adamdarǵa qozǵalysty qamtamasyz etý máselesi kózdelgen tıisti taraý bar, -deıdi Jol polıtsııasy komıtetiniń tóraǵasy Berik Bısenqulov.
Máselen, kóliktiń tizgininde múgedek jan nemese tirek-qımyl apparaty buzylǵan adamdarǵa qyzmet kórsetetin ózge júrgizýshi bolǵan jaǵdaıda, olarǵa toqtaýǵa jáne turaqtanýǵa tyıym salatyn jol belgileri qoldanylmaıdy.
Jol polıtsııasy komıteti sondaı-aq basqa da problemalarǵa nazar bóldi. «Qazaqstan Respýblıkasynda múgedekterdi áleýmettik qorǵaý týraly» zańyna sáıkes turǵyn úı qurylysy aýmaǵynda jeńil kólikterdi ýaqytsha qoıý turaqtaryn josparlaý jáne qurylys kezinde nemese qyzmet kórsetý ǵımarattarynyń janynda múgedekterdiń kólikteri úshin turaq ornyn qamtamasyz etý qajet. Osy arnaıy belgilerimen belgilengen turaq oryndaryna basqa kólik quraldaryn qoıýǵa bolmaıdy. Degenmen, kóptegen júrgizýshiler osy erejeni saqtamaıdy. Osyǵan baılanysty ilespe zań jobasymen ІІM JPK-nyń bastamasy boıynsha qoldanystaǵy Ákimshilik quqyqbuzýshylyqtar týraly kodeksine ózgerister engizilýde. Ózgeristerge sáıkes, osy sanattaǵy azamattardyń kóligine arnalǵan orynǵa mashınany turaqqa qoıý elý aılyq eseptik kórsetkish mólsherinde aıyppul salýǵa ákep soǵady.
ІІM Jol polıtsııasy komıteti jergilikti atqarý organdarymen birlesip, múgedekter úshin qolaıly jaǵdaı jasaý boıynsha maqsatty jumys júrgizýde. Kópshilik oryndarda nemese múgedekterge qyzmet kórsetýge baǵyttalǵan mekemelerdiń janynda arnaıy sınhrondy dybys jáne jaryq sıgnaldarymen baǵdarshamdar, jol belgileri, dybys jáne jaryq qurylǵylarymen jabdyqtalǵan jaıaý júrginshiler ótpeleri ornatylýda.
Budan basqa, osy jyly Internet júıesindegi ІІM JPK-nyń saıtynda nashar kóretin adamdar úshin saıttyń arnaıy nusqasy iske qosylady. Joldarda olar úshin teń jaǵdaı jasaýǵa baǵyttalǵan basqa da sharalar qabyldanýda.
