Jańa zań jobasy shekarada oryn alǵan shetin oqıǵalardyń qaıtalanýyna jol bermeıdi - UQK Shekara qyzmeti
ASTANA. 21 qarasha. QazAqparat -«Memlekettik shekara týraly» jańa zań jobasy «Terisaıyryq» pen «Arqankergen» shekara beketinde oryn alǵan keleńsiz oqıǵalardyń qaıtalanýyna jol bermeıdi.
Bul týraly Májilistiń jalpy otyrysynda «Qazaqstan Respýblıkasynyń Memlekettik shekarasy týraly» zań jobasyn talqylaý barysynda QR Ulttyq qaýipsizdik komıteti Shekara qyzmeti dırektorynyń mindetin ýaqytsha atqarýshy Turǵanbek Stambekov málim etti.
T. Stambekovtyń aıtýynsha, zań jobasynda «Terisaıyryq» pen «Arqankergen» shekara beketinde oryn alǵan oqıǵalardyń qaıtalanýyna jol bermeıtindeı normalar qarastyrylǵan. Bul rette UQK ókili shekarada oryn alǵan oqıǵalar saraptalǵanyn alǵa tartady. «Osy baǵytta zań jobasynyń 56-shy babynda azamattardy ásker qataryna shaqyrýdy júrgizý kezeńine shaqyrý komıssııasynyń quramyna ulttyq qaýipsizdik komıtetiniń terrıtorııalyq organ basshylary orynbasarlarynyń arasynan komıtet ókili kiretin bolady. Sonymen qatar, ákimshilikterdiń áskerı basqarmalarǵa bergen jıyntyq málimetteri negizinde monıtorıng jasalyp, shekara qyzmetine alynatyn úmitkerler irikteledi. Shekara qyzmetine laıyqtylardy psıhofızıologııalyq tekserýden ótkizý normalary qamtyldy. Sol arqyly biz shekara qyzmetiniń talaptaryna saı kelmeıtin sarbazdardyń osy qyzmetke ótip ketýine tosqaýyl qoıamyz», - dedi T. Stambekov.
