Jańa zań jobasy menshik quqyǵyn qorǵaýdy kúsheıtý maqsatyn kózdeıdi
ASTANA. 17 qazan. QazAqparat - «Qazaqstan Respýblıkasynyń keıbir zańnamalyq aktilerine menshik quqyǵyn qorǵaýdy kúsheıtý, sharttyq mindettemelerdi qorǵaýdy kepildendirý jáne olardy buzǵany úshin jaýapkershilikti qatańdatý máseleleri boıynsha ózgerister men tolyqtyrýlar engizý týraly» zań jobasy Májilis depýtattarynyń qaraýyna usynyldy. Bul zań jobasy boıynsha jumys tobyn aıqyndap bekitý jáne qorytyndy ázirleý mindeti Májilistiń Zańnama jáne sot-quqyqtyq reforma komıtetine júkteledi.
Bul zań jobasy Memleket basshysynyń 2012 jylǵy 14 jeltoqsandaǵy «Qazaqstan-2050» strategııasy: qalyptasqan memlekettiń jańa saıası baǵyty» atty Qazaqstan halqyna Joldaýyn iske asyrý jónindegi jalpyulttyq is-sharalar josparyna sáıkes ázirlengen.
Zań jobasy menshik quqyǵyn qorǵaýdy kúsheıtý, sharttyq mindettemelerdi qorǵaýdy kepildendirý jáne olardy buzǵany úshin jaýapkershilikti qatańdatý maqsatyn kózdeıdi.
Zań jobasynda tıisti aktini shyǵarǵan memlekettik organnyń nemese laýazymdy adamnyń kinásine qaramastan, zańsyz aktilerdi shyǵarý nátıjesinde menshik ıesine keltirilgen zalaldy óteý týraly elimizdiń Azamattyq kodeksiniń 267-babynyń redaktsııasyn naqtylaý usynylǵan.
Kepilmen qamtamasyz etilgen mindettemelerdi merziminen buryn oryndaý jáne kepilge salynǵan múlikten óndirip alý týraly normalardy eki jaqty túsindirýdi joıý kózdelýde.
Jyljymaıtyn múliktiń naqty obektisi jónindegi aqparat quqyq ıelenýshiniń suraý salýlary boıynsha, sondaı-aq ózge tulǵalardyń suraý salýlary boıynsha, biraq quqyq ıelenýshiniń kelisimimen beriletin normany bekitý usynylyp otyr. Budan basqa, quqyq ıelenýshiniń kelisiminsiz osyndaı aqparatqa qoljetimdilikti alýǵa quqyly adamdardyń tolyq tobyn belgileý qajet.
Notarıat kýálandyrǵan mámile jasasqan jaǵdaıda jyljymaıtyn múlikke quqyqtardy memlekettik elektrondyq tirkeý mindettiligin belgileý usynylǵan.
Zań jobasynda Azamattyq kodekske, onyń Jalpy jáne Erekshe bólimderine, elimizdiń «Jyljymaıtyn múlik ıpotekasy týraly» jáne «Jyljymaıtyn múlikke quqyqtardy memlekettik tirkeý týraly» zańdaryna ózgerister men tolyqtyrýlar engizý kózdelýde.
