Jańa zań jobasy kásipodaqtyń áleýmettik áriptestiktegi rólin kúsheıte túsedi
ASTANA. QazAqparat - Jańa zań jobasy kásipodaqtyń áleýmettik áriptestiktegi rólin kúsheıte túsedi. Búgin Parlament Májilisiniń jalpy otyrysynda «Kásiptik odaqtar týraly» zań jobasyn talqylaý barysynda Eńbek jáne halyqty áleýmettik qorǵaý mınıstri Tamara Dúısenova osylaı málim etti.
Eske sala keteıik, búgin zań jobasyn palata depýtattary birinshi oqylymda maquldady.
Mınıstrdiń sózine qaraǵanda, qujatta kásipodaq qozǵalysynyń uıymdyq negizderi aıqyndalady. Sonymen qatar, zań jobasy qyzmetkerlerdiń áleýmettik-ekonomıkalyq quqyqtary men múddelerin qorǵaýdy, áleýmettik janjaldardyń aldyn alýdy jáne osy úshin áleýmettik áriptestiktiń rólin arttyrýdy maqsat tutady. «Bul rette birinshiden, qyzmetkerler múddesi ókildigin bildirýde, kelissózder júrgizý barysynda kásipodaqtardyń basym quqyǵyn berý qarastyrylǵan. Al qoldanystaǵy tájirıbe boıynsha qyzmetkerler ókilettik bergen jeke azamattar nemese zańdy tulǵalar kásipodaqtarmen teńdeı dárejede ókildik ete alatyn edi», - deıdi Tamara Dúısenova.
Onyń sózine qaraǵanda, zań jobasynda áleýmettik áriptestik jónindegi komıssııalardyń ókilettigin ulǵaıtý, olardyń fýnktsııalaryn retteý kózdeledi. Mysaly kásipodaq qozǵalysynyń respýblıkalyq deńgeıinde áleýmettik eńbek qatynastary salasyndaǵy zań jobalaryn qarap, uıǵarymdar daıyndaý, áleýmettik eńbek daýlary men janjaldaryn boldyrmaý normalary qarastyrylǵan.
«Budan bólek, kásipodaqtar áleýmettik áriptestik boıynsha múshelikke mindetti bolady. ıAǵnı, kásipodaqtardyń qyzmetin áleýmettik áriptestiktiń tıisti deńgeıinde múshelilik qaǵıdatymen qurý usynylyp otyr. Bul rette kásiporyndar bastaýysh kásipodaq uıymy qyzmetkerleriniń ókili bolyp esepteledi. Bastaýysh kásipodaq uıymy qyzmetkerleriniń múddelerin óńirlik deńgeıde qorǵaý úshin kásipodaqtardyń óńirlik birlestikterine birigý quqyǵy beriledi. Al múddeni salalyq deńgeıde qorǵaý úshin salalyq kásipodaqtarǵa múshe uıym retinde kirigý usynylady», - deıdi T. Dúısenova.
