Jańa zań jobasy boıynsha QR Aqparat jáne baılanys mınıstrligi teleradıohabar taratý qyzmetin lıtsenzııalamaıdy - N. Orazov
ASTANA. 26 sáýir. QazAqparat /Jasulan Amanbaıuly/ - Teleradıohabar taratý sýbektileri lıtsenzııalanýǵa jatpaıdy. QR «Teleradıohabar taratý týraly» zań jobasyn daıarlaý barysynda lıtsenzııalaý máselesi alynyp tastaldy.
Bul týraly búgin Astanada ótken dóńgelek ústel barysynda QR Baılanys jáne aqparat vıtse-mınıstri Nuraı Orazov málim etti.
«QR Teleradıohabar taratý týraly» zań jobasyn daıarlaý barysynda teleradıohabar taratý qyzmetin lıtsenzııalaý asa qajetti rásim dep tabylǵan joq. Biz odan bas tarttyq. Bul óz kezeginde telearnanyń tirkelýin jáne damýyn tejeıtin kóptegen qajeti shamaly kedergilerdi alyp tastaıdy»,-deıdi N. Orazov. Onyń aıtýynsha, mundaı jańalyq teleradıohabar taratýshy operatorlarǵa da qatysty bolmaq.
Degenmen vıtse-mınıstr, «mınıstrlik telearnalardy tirkeýden ótkizý, dálirek aıtqanda BAQ retindegi esepke alý rásimin engizý máselesin kóterip jatqandyǵyn» aıtty. Sebebi praktıkada teleradıoarnalarǵa eshbir tirkeý júrgizilmeıtin bolsa, olardyń mártebesi BAQ retinde aıqyndalmaı qalady.
«Teleradıoarna buqaralyq aqparat quraly bolǵandyqtan, sonymen qatar zań jobasynda, sonyń ishinde EQYU-nyń usynysy boıynsha, «teleradıoarnaǵa - BAQ» anyqtamasy berilgen bolatyn. Olaı bolsa, biz bunyń aldynda lıtsenzııalaý normasynan bas tartsaq ta, teleradıoarnalardy tirkeýden ótkizý jónindegi usynysty alǵa tartamyz»,-dedi N. Orazov.
N.Orazovtyń atap ótkenindeı, lıtsenzııalaýǵa qaraǵanda BAQ-yn esepke alý rásimi áldeqaıda jeńil ótedi. Sonymen birge teleradıokompanııalar oǵan anaǵurlym az ýaqyt pen qarjy shyǵyndaıdy.
«Endi jańa zań qabyldanar bolsa, BAQ-yn esepke alý jumystary asa úlken qıyndyq týdyrmaıtyn bolady. Oǵan ýaqyt kóp talap etilmeıdi. Qajetti tólenetin aqsha somasy da az bolady. Shamamen 6-7 myń teńge shamasynda. Qajetti qujattar tizimi kóp suratylmaıdy»,-dedi N. Orazov.
