Jańa zań jobasy baspana salýǵa ketetin shyǵyndy azaıtady - Q.Óskenbaev
ASTANA. QazAqparat - «Turǵyn úı qurylysyna úlesker retinde qatysý týraly» jańa zań jobasy qabyldansa, úı turǵyzýdyń quny arzandaıdy. Bul týraly búgin Ulttyq ekonomıka vıtse-mınıstri Qaıyrbek Óskenbaev məlim etti.
«Bul zań jobasy qabyldansa, baspana salýǵa ketetin shyǵyn kem degenda 10 paıyzǵa arzandaýy kerek. Biraq, daıyn úıdiń baǵasy qymbattaı ma, joq pa, ol suranys pen usynysqa baılanysty bolmaq. Ózderińiz bilesizder ǵoı, úı baǵasy Astanada bir bólek, Kókshetaýda bólek baǵa», - dedi jýrnalısterdiń suraǵyna jaýap bergen Q.Óskenbaev.
«Biz qurylys salǵan tarapqa pəter baǵasyn osyndaı kólemde bekit dep buıyra almaımyz. Biz tek memlekettik baǵdarlamaǵa qatysýshy kompanııalardy mindetteı alamyz», - deıdi vıtse-mınıstr.
Q.Óskenbaev túsindirgendeı, «Bəıterek» holdıngi jalǵa beriletin baspana salady, Turǵyn úı qurylys jınaq banki de memlekettik baǵdarlamaǵa qatysady, sondyqtan, osy baǵdarlamalar aıasynda salynatyn baspananyń baǵasyn retteýge bolady. «Al eger qurylys kompanııasy úıdi ózi salsa, pəterlerdiń baǵasyn retteýge aralasa almaımyz», - deıdi ol.
