Jańa zań jobasy advokatýra salasyna serpin berer degen senimdemin - Djohar Ótebekov
ASTANA. QazAqparat - Belgili advokat Djohar Ótebekov «Advokattyq qyzmet jáne zań kómegi týraly» jańa zań jobasyna qatysty pikirin bildirdi, dep habarlaıdy «QazAqparat» HAA tilshisi.
«Advokatýra salasyna ózgeris engizý qajettigi burynnan beri týyndaǵan bolatyn. Ókinishke oraı, advokatýra ózdigimen jumysyn retke keltirý baǵytynda jumys atqara alǵan joq. Sol sebepti, memlekettiń bul salany qolǵa almasqa sharasy qalmady. Zań jobasy advokatýra salasyna jańa serpin berer degen senimdemin. Birinshi kezekte, onda qarastyrylǵanyndaı advokattar alqasyna ený úshin alǵashqy jarna tóleý (800 myń teńge - avt.) mindetin alyp tastaýdy qoldaımyn. Bul qadam avdokattardyń sanyn kóbeıtip, ózara básekelestikti kúsheıte túsedi, advokatýra salasyn jasartady», - deıdi Djohar Ótebekov.
Sonymen qatar, ol advokattardyń jumysyn jeńildetetin zań jobasynyń taǵy bir tarmaǵy týraly sóz qozǵady.
«Advokattar prezıdıýmynyń, aımaqtyq advokattar alqasynyń músheleri men tóraǵalarynyń basshylyq merziminiń qysqarýyn qos qoldap qoldaımyn. Óıtkeni, ókinishke oraı, bul salada tyǵyryqqa uqsas jaǵdaı qalyptasqandyqtan, naqty reforma kerek. Kóptegen prezıdıýmnyń músheleri 20 nemese 30 jyl boıy otyrǵandyqtan, eshteńe ózgeretin emes», - deıdi ol.
Djohar Ótebekov sondaı-aq, zań jobasynyń kelispeıtin tustary týraly da sóz qozǵady.
«Kóptegen áriptesterimizben advokattardyń tártiptik komıssııasynyń quramynda Ádilet mınıstrligi óz ókilderin engizgeli jatqanyna qarsylyq bildirip jatyrmyz. Sebebi, bul turǵydaǵy qadam ózin-ózi retteý baǵytyndaǵy zańǵa qaıshy keledi. Advokatýra ózin-ózi retteıtin uıym. Qazirgi ýaqytta advokattar alqasynyń jumysynda advokattardyń ústinen túsken shaǵymdy qaraý jabyq túrde ótedi. Álbette, bul jumystyń ashyqtyǵyn qamtamasyz etýimiz kerek. Kompromıs retinde tártiptik komıssııanyń otyrystaryn ashyq túrde ótkizý jón dep bilemin. Otyrystyń bir daýysy bar quqyqtyq turǵyda Ádilet mınıstrliginiń ókilderiniń BAQ pen Úkimettik emes uıymdardyń ókilderin de shaqyrylýyna qarsylyq aıtpas edim», - deıdi ol.
Aıta ketsek, búgin Astanada Qazaqstan zańgerler odaǵynyń ekinshi sezi ótip jatyr. Shara barysynda «Zańgerlerdiń etıkalyq kodeksi» men Zańgerler odaǵynyń 5 jyldyń jumysynyń esebi tanystyrylmaq.
