Jańa zań jobasy: Jeke detektıvterge qandaı talaptar qoıylady
ASTANA. KAZINFORM – Elimizde jeke detektıvterdiń qyzmeti zańmen rettelmek. Osy oraıda olarǵa qoıylatyn talaptar týraly Parlamentarızm ınstıtýtynyń sarapshysy Nurtaı Imanǵalıev aıtyp berdi.
«Konstıtýtsııanyń 13 babyna sáıkes, ár adam óziniń quqyǵy men bostandyǵyn qorǵaý maqsatynda zańǵa qaıshy kelmeıtin ártúrli tásildi qoldanýǵa quqyǵy bar. «Jeke detektıvtik qyzmet týraly» Qazaqstan Respýblıkasy zańynyń jobasynyń maqsaty – osy qyzmetti zańmen retteý. Jańa zań aıasynda jeke detektıvter men olardyń qyzmetine qoıylatyn birqatar talap, mindet pen shekteý bar. Atap aıtsaq, jeke detektıv pen onyń kómekshisi mindetti túrde Qazaqstannyń azamaty bolýy kerek. Ózge eldiń azamattary detektıv bola almaıdy, sonymen qosa sheteldiń detektıvtik agenttikteri elimizde fılıaldaryn ashyp, qyzmet etýge quqyǵy joq», - dedi Nurtaı Imanǵalıev «AMANAT» partııasy qabyrǵasynda ótken dóńgelek ústel barysynda.
Onyń aıtýynsha, jeke detektıvterdiń qyzmetin retteıtin ýákiletti organ belgilenedi. Ol Іshki ister mınıstrligi nemese Ádilet mınıstrligi bolýy múmkin.
«Jeke detektıvterge qoıylatyn talaptarǵa kelsek, aldymen Qazaqstan Respýblıkasynyń azamaty, jasy 30-dan asqan, joǵary zań bilimi bar bolýy mindetti. Sonymen qatar quqyq qorǵaý nemese arnaıy organdarda tergeý ne bolmasa jedel qyzmette 10 jyl ótili bar bolýy tıis. Odan bólek, sotty bolmaǵan jáne densaýlyǵyna qatysty talaptar bar», - deıdi ol.
Sondaı-aq, spıker jeke detektıvterdiń nemen aınalysatynyn aıtyp berdi.
«Іs-túzsiz joǵalǵan azamattardy, dúnıe múlikti izdeýmen aınalysýǵa quqyly. Sonymen qatar jańa zań jobasynda arnaıy quraldardyń kómegimen syrttaı baqylaý qarastyrylǵan. Eger zańdy talqylaý barysynda syrttaı baqylaý qoǵamda daý týdyrǵan jaǵdaıda, sala sarapshylary men mamandar keı baptardy qaıta qaraıdy. Taǵy bir aıta ketetin jaıt, ázirlenip jatqan zań jobasynda detektıvtik qupııa men jeke detektıvterdiń etıkasy qarastyrylyp jatyr. Mysaly, adamnyń jeke ómirine qul suǵýǵa bolmaıdy», - deıdi sarapshy.
Buǵan deıin habarlaǵanymyzdaı, elimizde jeke detektıvterdiń qyzmetin retteý maqsatynda arnaıy zań jobasy ázirlenip jatyr.
Aıta keteıik, búgin Astanada QR Prezıdenti is basqarmasy janyndaǵy Parlamentarızm ınstıtýty «AMANAT» partııasynyń qoǵamdyq saıasat ınstıtýtymen birlesip uıymdastyrǵan «Qazaqstandaǵy jeke detektıvtik qyzmetti zańnamalyq retteýdiń problemalyq máseleleri men perspektıvalary» taqyrybynda dóńgelek ústel ótti.
Atalǵan sharaǵa Senat jáne Májilis depýtattary, Parlamentarızm ınstıtýtynyń ǵalymdary men sarapshylar qatysty.
