Jańa zań jobasy: Tutynýshy endi birden sotqa júgine alatyn bolady

ASTANA. KAZINFORM — Tutynýshylardyń quqyǵyn qorǵaý týraly jańa zań medıtsına, týrızm, kólik, baılanys salasyndaǵy qyzmetterdi de retteıtin bolady.

Bul týraly QR SIM Tutynýshylardyń quqyqtaryn qorǵaý komıteti tóraǵasynyń orynbasary Serik Qusaıynov aıtty.

— 2023 jyldyń qyrkúıek aıynan bastap QR Parlamenti Májilisinde Tutynýshylardyń quqyǵyn qorǵaý týraly zań jobasy jańa redaktsııada qaralyp jatyr. Onda qazirgi tańda qoldanylatyn zańǵa qaraǵanda birshama ózgeris bar. Birinshiden, qazirgi zań boıynsha tutynýshy quqyǵyn qorǵaý úshin shaǵymdanýdyń 4 satysynan ótýi kerek. Ol Ata zańǵa qaıshy. Biz eń birinshe sol olqylyqty alyp tastadyq, — dedi ol «Tutynýshylardyń quqyqtaryn qorǵaý: bıznes, memleket jáne qoǵam dıalogy» atty forýmda.

Spıkerdiń aıtýynsha, osylaısha tutynýshylardyń quqyǵyn qorǵaýdyń birneshe satyly algorıtmi joıylyp, adam birden sotqa júgine alatyn bolady. Sondaı-aq jańa zań buryn qamtymaǵan salalarǵa da quzyreti jaıylatyn bolady.

— Qazirgi zań bólshek saýda, elektrondyq saýda jáne jaı turmystyq qyzmetter kórsetý kezinde tutynýshynyń quqyǵyn qorǵaıdy. Alaıda medıtsına, týrızm, kólik, baılanys qyzmetterin kórsetken kezde bul zań adamdardyń quqyǵyn qorǵaı almaıdy. Bul salalar basqa zańdarmen qorǵalady. Bolashaqta qabyldanatyn zańda biz bul olqylyqty joıamyz. Zań qabyldanǵan soń bizdiń memlekettik organ osy aıtylǵan qyzmetter boıynsha tutynýshylardyń quqyqtaryn qorǵaı alatyn bolady, — dedi Serik Qusaıynov.

Komıtet tóraǵasynyń orynbasary jańa zańnyń tek bir salada kúshi júrmeıtinin atap ótti. Ol — qarjy qyzmetterine qatysty. Sebebi bul salaǵa jaýapty ózge memlekettik organ — Qarjy naryǵyn retteý jáne damytý agenttigi bar.

Aıta keteıik, buǵan deıin tutynýshylar qaı salada kóp shaǵym túsiretini jaıly jazǵan edik.