Jańa zań shyǵarǵansha, bar zańnyń tıimdiligin arttyrý qajet – depýtat

QR Parlamenti Májilisi tóraǵasynyń orynbasary Danııa Espaeva jańa zańdar qabyldaýmen eldiń búkil problemasy sheshilmeıtinin aıtty, dep habarlaıdy Kazinform.

«Eldegi kóptegen máselelerdi sheshý degenimiz jańa zańdar qabyldaý ǵana emes. Sondaı-aq zańnamalyq protsesti ǵylymı qamtamasyz etýdi jetildirý qajet. Sońǵy jyldary ǵylymǵa, zańnamanyń strategııalyq damýyna jetkiliksiz kóńil bólinýde. Zertteýshiler ony damytý úshin tolyqqandy ǵylymı negiz qalyptastyrǵannan góri qoldanystaǵy quqyqty synǵa alady nemese oǵan túsinikteme beredi, — dedi Danııa Espaeva «Azamattyq qoǵam men parlamentshilerdiń zań shyǵarý salasyndaǵy yntymaqtastyq formattary týraly dıalogi» atty dóńgelek ústel barysynda.

Májilis depýtatynyń aıtýynsha, zań jobalardyń qazaq tilindegi mátinderiniń sapasyn arttyrý qajet.

«Bizdiń zańdarymyz kóbinese saıasattaǵy, ekonomıkadaǵy jáne qoǵamdyq ómirdegi jedel máselelerdi sheshýge baǵyttalǵan. Bul bizdiń qyzmetimizge synı kózqaras týyndatady jáne senimsizdik týdyrady. Jańa zań shyǵaryp qabyldaýdyń ornyna qoldanystaǵy zańdardyń tıimdiligin arttyrý qajet. Sondaı-aq zańnyń quqyqtyq túsindirý jumystaryn ýaqtyly júrgizý qajet. Kez kelgen quqyqtyq jańashyldyqqa bastamas buryn memleket halyqpen túsindirý jumystaryn belsendi júrgizýi tıis. Halyq ne úshin jáne qandaı maqsatta ózgerister engizilip, jańa zańdar qabyldanatynyn bilýi kerek», — deıdi ol.

Astanada «Azamattyq qoǵam men parlamentshilerdiń zań shyǵarý salasyndaǵy yntymaqtastyq formattary týraly dıalogy» atty dóńgelek ústel ótip jatyr.