Jańa zań normasy talapty kúsheıtti: baılanys operatorlary ınternet alaıaqtyqty toqtata ala ma
ASTANA. KAZINFORM — Memleket basshysy «QR keıbir zańnamalyq aktilerine telekommýnıkatsııalar naryǵyn jáne derekterdi óńdeý ortalyqtaryn damytý máseleleri boıynsha ózgerister men tolyqtyrýlar engizý týraly» QR Zańyna qol qoıdy.
Qujatqa saı, endi uıaly telefon, gadjet ne smartfondy satýshylar qurylǵynyń sáıkestendirý kodyn kórsetýge jáne oǵan qatysty eshqandaı shekteý ne buǵattaý joq ekenin tekserýge mindetteledi.
— Uıaly baılanystyń abonenttik qurylǵysyn ótkizý kezinde satýshy taýardy satyp alý (jumysty oryndaý, qyzmetti kórsetý) faktisin rastaıtyn qujattarda ótkiziletin uıaly baılanys abonenttik qurylǵysynyń sáıkestendirý kodtaryn kórsetýge mindetti. Satýshy uıaly baılanystyń abonenttik qurylǵysyn ótkizgenge deıin uıaly baılanys abonenttik qurylǵylarynyń sáıkestendirý kodtarynyń derekqory arqyly ótkiziletin uıaly baılanys abonenttik qurylǵysynyń tıisti sáıkestendirý kodtaryn shekteýlerdiń nemese buǵattaýdyń bar-joǵy turǵysynan tekserýge mindetti, — delingen zańda.
Sonymen birge, telekommýnıkatsııa jáne poshta baılanysy salalaryna da birqatar talap qoıylyp otyr.
— Baılanystyń ámbebap kórsetiletin qyzmetteri — telekommýnıkatsııalar jáne poshta baılanysy sektorynda bekitilgen, ýákiletti organ ázirleıtin jáne bekitetin baılanystyń kórsetiletin qyzmetteriniń eń az tizbesi, olardy kez kelgen eldi mekende baılanystyń kórsetiletin qyzmetterin kez kelgen paıdalanýshyǵa taǵaıyndalǵan merzimde, belgilengen sapada jáne osy kórsetiletin qyzmetterdiń qoljetimdiligin qamtamasyz etetin baǵa deńgeıinde kórsetý ámbebap qyzmet kórsetý operatorlary úshin mindetti bolady, — delingen qujatta.
Onda baılanys operatorlarynyń qyzmetine qatysty sharttar da qamtylǵan.
— Baılanys operatorynyń ótinishi boıynsha, ýákiletti organmen kelisý arqyly baılanys operatorlarynyń uıaly nemese spýtnıktik baılanys jabdyǵyna arnalǵan antenna-dińgekti qurylysjaılardy jáne (nemese) tireýishterdi salýy úshin elektrmen jabdyqtaý júrgizilgen oryndardy beredi, — delingen zańda.
Degenmen, baılanys operatorlarynyń qurylǵylary talapqa saı bolmasa, ony óshirýi ne basqa jerge kóshirýi kerek.
— Baılanys operatorlarynyń geostatsıonarlyq emes spýtnıkteriniń abonenttik qurylǵylary elektrmagnıttik úılesimdilikten ótpeıdi. Geostatsıonarlyq emes spýtnıktik baılanys operatorynyń abonenttik qurylǵysy basqa tehnıkalyq quraldarǵa basqa jıilikterde radıobógeýilder jasaǵan kezde geostatsıonarlyq emes spýtnıktiń abonenttik qurylǵysynyń ıelenýshisi baılanys qyzmetteri sapasynyń tehnıkalyq parametrlerin ólsheý ádistemesine sáıkes, ýákiletti organnyń talaby boıynsha mundaı qurylǵyny ajyratýǵa ne onyń ornyn aýystyrýǵa tıis, — delingen qujatta.
Baılanys operatorlaryna qatysty ózge de mindettemeler bar.
— Uıaly baılanys operatorlary áleýmettik jáne memlekettik máni bar mobıldi qosymshalarǵa árbir paıdalanýshynyń táýlik boıy jáne tarıftelmeıtin qosylýyn qamtamasyz etedi, mundaı qosymshalardyń tizbesin ýákiletti organ aıqyndaıdy, — delingen qujatta.
Zańda spýtnıktik baılanys operatorlaryna qoıylatyn talaptar da qarastyrylǵan.
— Spýtnıktik baılanys operatorlarynda abonenttik qurylǵylardy basqarý pýltiniń bolýy jáne olar Qazaqstan Respýblıkasynyń Ulttyq qaýipsizdik komıtetimen kelisý boıynsha ýákiletti organ aıqyndaıtyn tártippen Qazaqstan Respýblıkasynyń telekommýnıkatsııa jelilerine jalǵaý (qosý) núktesin qurýǵa mindetti, — delingen qujatta.
Sondaı-aq, baılanys operatorlaryna:
• abonentti sáıkestendirý jáne (nemese) aýtentıfıkatsııalaý kodtaryn, onyń ishinde birinshi dybysbelgige deıin nemese odan keıin úziletin shaqyrýlardy;
• aldyn ala jazylǵan daýystyq habarlamalardy ótkizý boıynsha baılanys operatorlarymen ózara is-qımyl jasaý talaptary shartta kózdelgen jaǵdaılardy qospaǵanda, osyndaı habarlamalardy berý úshin jasalatyn generatsııalanǵan avtomatty shaqyrýlardy ótkizýge tyıym salynady.
Bul talaptar ınternet alaıaqtyqtyń aldyn alýǵa arnalǵan.
— Baılanys operatorlary quqyqqa qaıshy áreketterdi bolǵyzbaý maqsatynda baılanys jelilerinde alaıaqtyq áreketter úshin paıdalanylatyn nómirler men trafık belgileri týraly ózara aqparat almasýǵa mindetti, — delingen zańda.
Aıta keteıik, atalǵan zańǵa QR Prezıdenti Qasym-Jomart Toqaev 2026 jyldyń 19 maýsymynda qol qoıdy.
Zań 2027 jylǵy 1 shildeden bastap qoldanysqa engiziletin 1-baptyń 7-tarmaǵy 3-tarmaqshasynyń úshinshi abzatsyn qospaǵanda, alǵashqy resmı jarııalanǵan kúninen keıin kúntizbelik alpys kún ótken soń qoldanysqa engiziledi.
Eske salaıyq, buǵan deıin SQO-da 30-dan astam ınternet alaıaqtyqqa qatysy bar bes «dropovod» sottalǵanyn jazǵanbyz.
