Jańa zań kúshine endi: Memlekettik satyp alý salasynda qandaı ózgerister bar
ASTANA. KAZINFORM - 2025 jyldyń 1 qańtarynan bastap elimizde «Memlekettik satyp alý týraly» Zań kúshine engen bolatyn. Satypalymnyń jańa tártibi jobalardy iske qosýdy jedeldetip, sybaılas jemqorlyqtyń syn-qaterin azaıtý men jergilikti bıznesti qoldaýǵa baǵyttalǵan.
Máselen, osy jyldyń 11 naýryzyndaǵy jaǵdaıǵa súıensek, 2 727,6 mlrd teńge somasyna 554 240 kelisimshart jasaldy.
Salystyrmaly túrde alsaq, byltyrǵy kezeńde 860,3 mlrd teńge somasyna 327 206 kelisimshart jasalǵan-dy.
Buǵan qosa, reıtıngti-baldyq júıeni paıdalaný arqyly konkýrs jeńimpazdary 5-9 jumys kúni ishinde anyqtalady.
- Atalǵan ádis jeńimpazdy anyqtaý protsesine konkýrstyq komıssııanyń qatysýyn qajet etpeıdi. Osy arqyly sybaılas jemqorlyq qateri seıiledi. Aıtalyq, Astanadaǵy №3 qalalyq aýrýhananyń birneshe ǵımaratyn kúrdeli jóndeýge baılanysty satypalymdy ótkizýge nebári 6 jumys kúni jetkilikti boldy.
Kelisimsharttyń somasy – 1,8 mlrd teńge. Merdiger uıym Astanada tirkelgen.
Kúrdeli jóndeýge baılanysty joba ınfraqurylymdy jańǵyrtýmen qatar, aýrýhanany jańa medıtsınalyq jabdyqtarmen jaraqtandyrýdy da qamtıdy, - dep jazdy Qarjy mınıstrliginen.
Sol sııaqty, qysqa merzim ishinde (6 jumys kúni) Almatydaǵy «Alataý» shaǵyn aýdanynda sýmen jabdyqtaý jáne sý tartý jelilerin salýǵa baılanysty jergilikti merdiger anyqtaldy.
Kelisimsharttyń somasy – 702 mln teńge. Atalǵan joba arqyly shaǵyn aýdan aýyz sýmen qamtylyp, káriz jelisi retke keltiriledi.
Satypalymnyń jedel jasalýyn eskere otyryp, merdigermen tıisti kelisimshart jasaldy. Qajetti jumystardyń aıaqtalý merzimi 2025 jyldyń jeltoqsanyna josparlanǵan. Osy jobaǵa sáıkes sýdy ótkizý qarqynyn arttyryp, onyń sapasyn jaqsartýmen birge aǵyndy sýlardy burýdy jolǵa qoıý kózdelip otyr.
- 5,5 aıdyń ishinde Batys Qazaqstan oblysyndaǵy Qaraózen mektep-lıtseıine kúrdeli jóndeý júrgiziletin bolady. Atalǵan jobaǵa sáıkes bólmeler oqý kabınetterine keltirilip, sondaı-aq aýmaqtardy abattandyrý boıynsha barlyq jumys túri iske asyrylady.
Satyp alý rásimderi 9 jumys kúni ishinde ótkizilip, jeńimpaz retinde jergilikti kompanııa anyqtaldy, - delingen aqparatta.
Reıtıngti-baldyq júıe arqyly 7 jumys kúni ishinde Jezqazǵan qalasynyń oblystyq medıtsınalyq kolledjin jóndeý úshin jergilikti merdiger anyqtaldy.
Qazir stýdentter kontıngentiniń ulǵaıýyn eskere otyryp, kúrdeli jóndeý júrgizýdiń shuǵyl qajettiligi týyndap otyr.
Quny 564,8 mln teńge bolatyn joba boıynsha bólmelerdi tıisti talapqa sáıkes oqý aýdıtorııalaryna keltirý úshin barlyq jumys túri júrgizilip, aýmaqtar abattandyrylady.
Shymkentte 8 jumys kúnniń ishinde 3 mektepti kúrdeli jóndeýden ótkizýge jaýapty jergilikti kompanııa anyqtaldy.
Bul kelesi oqý jylyn 3 000-nan astam oqýshynyń jaraqtalǵan zamanaýı kabınetterde jáne jaıly ǵımarattarda qarsy alýǵa múmkindik beredi.
Tutastaı alǵanda, memlekettik satyp alýdy júzege asyrýdyń jańa tártibi konkýrsty ótkizý merzimin qysqartyp, qyzmet kórsetýshilerge satypalymǵa qatysýǵa teńdeı múmkindikter berdi, sondaı-aq jergilikti kompanııalardy qajetti jumyspen qamtamasyz etti.
Aıta keteıik, Aqmola oblysy aýdandyq bilim bólimi memlekettik satyp alýdaǵy zań buzýshylyq úshin 1 mln teńge aıyppul arqalady.