«Qazaqstan turǵyn úı kompanııasy» kepildigin berý rásimi jeńildetildi

ASTANA. KAZINFORM – Elimizde qurylys kompanııalarynyń «Qazaqstan turǵyn úı kompanııasy» AQ kepildigin alýy úshin qoıylatyn talaptar jeńildetildi. Bul týraly QR ÓQM Qurylys jáne turǵyn úı kommýnaldyq sharýashylyq isteri komıteti tóraǵasy Baqytjan Júnisbekov aıtty.

— Qurylys kompanııalaryn qarajatty zańdy jolmen tartýǵa yntalandyrý maqsatynda Biryńǵaı operator kepildigin alý talaptary jeńildetildi: tájirıbege qoıylatyn talap 3 jyldan 2 jylǵa qysqardy, qurylys kólemi boıynsha talap respýblıkalyq mańyzy bar qalalar men astanada – 18 myń sharshy metrden 10 myń sharshy metrge, óńirlerde – 9 myń sharshy metrden 5 myń sharshy metrge deıin tómendetildi, – dedi ol OKQ alańyndaǵy baspasóz máslıhatynda. 

Onyń aıtýynsha, Biryńǵaı operatordyń kepildigi — úleskerlerdiń quqyqtaryn qorǵaýdyń memlekettik tetigi. Ol «Qazaqstan turǵyn úı kompanııasy» AQ arqyly júzege asyrylady jáne qurylys salýshynyń defolty jaǵdaıynda nysan qurylysyn tolyq aıaqtaýdy qamtamasyz etýge baǵyttalǵan.

— Sonymen qatar, qurylys salýshy ne ýákiletti kompanııa qysqa jáne uzaq merzimdi mindettemelerdi shegergennen keıingi jıyntyq aktıvterdiń keminde 10 %-yna teń aktıvke ıe bolýy tıis, – dedi Baqytjan Júnisbekov. 

Eske salsaq, 30 maýsymda Memleket basshysy «Qazaqstan Respýblıkasynyń keıbir zańnamalyq aktilerine turǵyn úı qurylysyna, avtomobıl joldaryna úlestik qatysý jáne múgedek adamdardy tasymaldaý boıynsha qyzmetter kórsetý máseleleri boıynsha ózgerister men tolyqtyrýlar engizý týraly» QR Zań qabyldandy. Jańa zań elimizde turǵyn úı qurylysyna úlestik qatysý salasyndaǵy syn-qaterlerdi azaıtyp, qurylys salýshylardyń josyqsyz tájirıbesin retteýge baǵyttalǵan normalar bar.