Jańa zań elimizdegi mass-medıanyń áleýetin arttyra túsedi – Memleket basshysy

ASTANA. KAZINFORM – Memleket basshysy jýrnalıstermen kezdesýde «Mass-medıa týraly» zań óte mańyzdy qujat ekenin atap ótti. Bul týraly Aqordanyń baspasóz qyzmeti habarlady.

Memleket basshysy sonymen qatar atalǵan zań aqparattyq derbestigimizdi nyǵaıtýǵa múmkindik beretinin aıtty.

«Ózderińizge málim, jýyrda men «Mass-medıa týraly» zańǵa qol qoıdym. Óte mańyzdy qujat. Jýrnalısterdiń múddesi men quqyqtaryn qorǵaý tetikteri kúsheıtilgen dep aıtýǵa bolady. Bul qujat elimizdegi mass-medıanyń áleýetin arttyra túsedi dep oılaımyn. Sondaı-aq aqparattyq derbestigimizdi nyǵaıtýǵa múmkindik beredi. Erteń Parlamenttiń kezekti sessııasy aıaqtalady. Depýtattar mańyzdy oqıǵalardyń bel ortasynda júr. Saılaýshylarmen tyǵyz jumys istep jatyr. Olar ózekti máselelerdi kóterip, qoǵamdyq pikirtalasqa uıytqy bolyp otyr. Halyqqa qajet zańdardy qabyldaý jóninde bastamalar kóterýde. Osy sessııanyń ózinde eldiń damýyna tikeleı yqpal etetin 100-den astam zań qabyldandy», - dedi Prezıdent.

Memleket basshysy jýrnalıster qaýymy ulttyq parlamentarızmdi damytýǵa qashanda zor úles qosyp keletinin jetkizdi.

«Jalpy, depýtat pen jýrnalıst qyzmeti biri-birimen tyǵyz baılanysyp jatyr. Ekeýi de el múddesin qorǵaıdy. Halyq senimin arqalap, oǵan múltiksiz qyzmet etedi. Qazir depýtattar korpýsy men mass-medıa ókilderi úılesimdi jumys istep jatyr. Jýrnalıster qaýymy ulttyq parlamentarızmdi damytýǵa qashanda zor úles qosyp keledi. Qazirgi depýtattar quramynda aqparat salasynyń ókilderi jetkilikti. Atap aıtqanda, Nurtóre Júsip, Ermurat Bapı, Qazybek Isa, Sergeı Ponomarev, Janarbek Áshimjan, Bıbigúl Jeksenbaı, Aıgúl Qapbarova sekildi áriptesterińiz kópshilikke belgili. Ult múddesin qorǵap júrgen jýrnalısterdiń Parlament tórinde otyrýy – zańdylyq. Aıtpaqshy, Prezıdent Ákimshiliginde de áriptesterińiz az emes. Olar óz kásibı ortasyna qoldaý bildirip, buqaralyq aqparat quraldary men memlekettik organdar arasynda altyn kópir qyzmetin atqarady. Jańa aqparattyq dáýirge qadam bastyq. Osy oraıda memlekettik basqarý júıesi sóz biletin, tıimdi ári jan-jaqty qarym-qatynas ornata alatyn adamdarǵa zárý. Sondyqtan óz mansabyn memlekettik qyzmetpen baılanystyrǵan nemese baılanystyrýdy josparlap júrgen áriptesterińiz osy salada da óz áleýetin tolyq júzege asyra alady», - dedi Prezıdent.

Buǵan deıin Memleket basshysy «Mass-medıa týraly» zańǵa qol qoıǵanyn jazǵan edik.