Jańa zań: Danııada zeınet jasy 70-ke deıin ulǵaıtyldy

ASTANA. KAZINFORM — Danııada zeınet jasyn Eýropadaǵy eń joǵary deńgeıge deıin kóterý týraly zań qabyldandy, dep habarlaıdy AZERTADJ.

Agenttik CNN-ge silteme jasap habarlaýynsha, Parlamentte 81 depýtat «qoldap», 21 depýtat «qarsy» daýys berdi.

Jańa zań 1970 jylǵy 31 jeltoqsannan keıin týǵandarǵa qatysty bolady. Qazirgi zeınet jasy orta eseppen 67 jas bolsa, 1967 jylǵy 1 qańtardan keıin týǵandar úshin ol 69 jasqa deıin ulǵaıtylýy múmkin.

Eńbek mınıstri Ane Halsbo-Iorgensen bul sheshimniń maqsaty — «bolashaq urpaqtyń laıyqty ál-aýqatyn qamtamasyz etý» ekenin aıtty.

Danııanyń Statıstıka basqarmasynyń resmı saıtyndaǵy málimetterge sáıkes, elde shamamen 6 mıllıon adam turady. Olardyń 713 myńǵa jýyǵy 60-69 jas aralyǵynda, al 580 myńǵa jýyǵy 70-79 jas aralyǵynda.

Danııa saqtandyrý kompanııalary men zeınet qorlarynyń saýda qaýymdastyǵy habarlaǵandaı, sońǵy jyldardaǵy úrdis boıynsha kóptegen danııalyq memlekettik zeınet jasyna jetkennen keıin de jumys isteı beredi.

F& P málimetteri boıynsha qazir Danııada zeınet jasynan asqan shamamen 80 myń adam eńbek etedi. Bul ósimniń sebebi — jaqsy ekonomıkalyq jaǵdaı, jumys berýshilerdiń ıkemdiligi, qarjylyq yntalandyrý jáne jumysqa degen umtylys.

Zeınetpen qamtamasyz etý dırektory ıAn V. Hansenniń aıtýynsha, 2040 jylǵa qaraı memlekettik zeınet jasyn 70 jasqa deıin kóterý kóptegen danııalyqtar úshin tańǵalarlyq bolýy múmkin.

— Alaıda statıstıka uzaq ýaqyt jumys istegendi qalaıtyn danııalyqtardyń sany artyp jatqanyn kórsetedi. Jaqsy jańalyq — kóptegen danııalyq densaýlyǵy men eńbekke degen yntasyn saqtap keledi, — dedi ol.

Danııa — 60 jastan joǵary zeınet jasyn belgileýge kóshken alǵashqy Eýropa eliniń biri. Bul sheshim Danııadaǵy zeınet jasyn álemdegi eń joǵarylardyń biri etip, Lıvııamen bir qatarǵa qoıady.

2023 jyldyń naýryzynda Frantsııada 64 jasqa deıin zeınet jasyn kóterýge qarsy bir mıllıonnan astam adam narazylyqqa shyqqan edi — bul Danııanyń jańa zeınet jasynan 6 jas tómen.

Qyrkúıekte Qytaı úkimeti erlerdiń zeınet jasyn 60-tan 63 jasqa, áıelder úshin — kásibine qaraı 50 men 55-ten sáıkesinshe 55 pen 58 jasqa deıin arttyrý týraly zań qabyldady.

Ulybrıtanııada zeınet jasy 2026-2028 jyldary 67 jasqa kóteriledi, al keıin 68 jasqa deıin ulǵaıýy múmkin.

AQSh-ta zeınet jasy Ulybrıtanııaǵa uqsas, biraq keıbir áleýmettik tólemder 62 jastan beriledi.

Densaýlyǵynyń jaqsy bolýy, ómir súrý uzaqtyǵynyń artýy jáne qashyqtan jumys isteý kóptegen amerıkalyqqa egde jasta jumys isteýge múmkindik beredi. Degenmen zertteýler boıynsha kóbinese qarjy tapshylyǵy olardy uzaq eńbek etýge májbúrleıdi.

Budan buryn Qazaqstanda 2025 jyly zeınet jasy erler úshin de, áıelder úshin de ózgermeıtini habarlandy.