Jańa zań birde-bir saıttyń jabylýyna sebep bolǵan joq - depýtat M. Ábenov
ASTANA. 9 aqpan. QazAqparat /Arman Asqarov/ - Bıyl qańtar aıynda Memleket basshysy qol qoıǵan «Zııatkerlik menshikti jetildirý máseleleri jónindegi keıbir zań aktilerine ózgerister men tolyqtyrýlar engizý týraly» Zań osy ýaqytqa deıin birde-bir ınternet saıttyń jabylýyna sebep bolǵan joq.
Bul týraly búgin Astanada ótken baspasóz máslıhatynda QR Parlamenti Májilisiniń depýtaty Murat Ábenov málim etti.
Onyń habarlaýynsha, búginde ǵalamtorda osy zańǵa qatysty taralyp jatqan qaýesetter shyndyqqa janaspaıdy. «Bul zań ınternet tutynýshylarǵa qandaı da bir jaýapkershilik júktep otyrǵan joq. Ol ǵalamtorǵa zańsyz salynatyn týyndylar avtorlarynyń quqyqtaryn barynsha qorǵaýdy kózdeıdi. Osylaısha, bireýdiń týyndysyn ınternetke zańsyz salǵany úshin eń aldymen eskertý jasalady. Al ondaı jaǵdaı taǵy da qaıtalanatyn bolsa, tártip buzýshyǵa aıyppul salynady. Negizi qazirgi kezde sanalýan ǵylymı jańalyqtardy ınternet arqyly zańsyz paıdalaný oqıǵalary kóptep kezdesedi. Biz osy ispetti zań buzýshylyqtardyń aldyn alýdy kózdeımiz. Osy ýaqytqa deıin jańa zań birde-bir saıttyń jabylýyna sebep bolǵan joq»,-deıdi M. Ábenov.
Halyq qalaýlysy atap kórsetkendeı, Parlament Májilisiniń tórtinshi shaqyrylymynyń depýtaty bolǵan Nurlan Ónerbaev ánder men mýzykalardy ǵalamtorda zańsyz paıdalaný máselesin jıi kótergen bolatyn.
