Jańa zań: áıelder men balalarǵa qatysty qylmys azaıdy ma

ASTANA. KAZINFORM – Ótken jyldyń sáýir aıynda Memleket basshysy «Qazaqstan Respýblıkasynyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» jáne «Qazaqstan Respýblıkasynyń Ákimshilik quqyq buzýshylyq týraly kodeksine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» eki zańǵa qol qoıdy. 

Endi kámeletke tolmaǵandarǵa qatysty zorlyq-zombylyq áreketteri úshin tek ómir boıyna bas bostandyǵynan aıyrý taǵaıyndalady. Buryn bul qylmys úshin jeńilirek jaza taǵaıyndalýy múmkin edi. Kámeletke tolmaǵandardy qýdalaý jáne óz-ózine qol jumsaýdy nasıhattaǵany úshin qylmystyq baptar da engizildi. Polıtsııa men sot júıesine otbasylyq qatynastar salasyndaǵy qylmystarmen belsendi kúresýge múmkindik beretin jaǵdaı jasalǵan.

Sondaı-aq turaqty jumys isteıtin jedel-tergeý toptary quryldy, olardyń quramyna 261 áıel-tergeýshi engizildi. Daǵdarys ortalyqtarymen ózara is-qımyl kúsheıtildi (búginde 74 daǵdarys ortalyǵy jumys isteıdi, onyń 61-inde baspana bar).

Zańnamalyq sharalar turmystyq quqyq buzýshylyqtardyń anyqtalýyn 199-dan 840-qa deıin arttyrýǵa yqpal etti, bul jalpy turmystyq qylmystyń aldyn alýdyń tıimdi quralyna aınaldy.

Nátıjeler:

• 27 myńnan astam qorǵanys uıǵarymdary berildi;
• minez-qulyqqa 6437 erekshe talap qoıyldy, onyń ishinde 5300 alkogolge tyıym salyndy;
• talaptardy buzǵany úshin 6 766 adam tartyldy (2024 jyly - 4 357), bul zańnamany baqylaý men qoldanýdy kúsheıtýdiń nátıjesi bolyp sanalady;
• daǵdarys ortalyqtaryna 1 355 adam júgindi (2024 jyly – 1 268), 278 áıel ornalastyryldy (2024 jyly – 258).

Barlyq shara kesheni otbasylyq-turmystyq qatynastar salasyndaǵy qylmystar sanyn azaıtýǵa qol jetkizýge múmkindik berdi.

• Kúndelikti ómirde kisi óltirý sany 6,4%-ǵa (125-ten 117-ge deıin), aýyr dene jaraqattary-25,5%-ǵa (337-den 251-ge deıin), dene jaraqattarynyń ortasha aýyrlyǵy-11,9%-ǵa (336-dan 296-ǵa deıin) qysqardy. Kisi óltirýden zardap shekkenderdiń sany 10,3%-ǵa (97-den 87-ge deıin), onyń ishinde áıelder 20,8%-ǵa (53-ten 42-ge deıin), al kámeletke tolmaǵandar 28,6%-ǵa (7-den 5-ke deıin) tómendedi.

Sonymen qatar Memleket basshysynyń tapsyrmasy boıynsha ІІM múddeli memlekettik organdarmen jáne qoǵamdyq ınstıtýttarmen birlesip «Quqyq buzýshylyqtyń aldyn alý týraly» tujyrymdamalyq jańa biryńǵaı zań ázirlenip jatyr. Atalǵan zań jobasynda aldyn alý sýbektileriniń ózara is-qımylynyń jańa formaty kózdelgen.