Jańa zań aıasynda parnıktik gazdardy shyǵarý boıynsha ákimshilik jáne qylmystyq jaýapkershilik kúsheıtiledi
ASTANA. 10 qarasha. QazAqparat /Arman Asqarov/ - Búgin Astanada ótken «dóńgelek ústel» otyrysynda «Parnıktik gazdardy joıý salasynda memlekettik retteý týraly» zań jobasy tanystyryldy.
Qujatty tanystyrǵan QR Qorshaǵan ortany qorǵaý vıtse-mınıstri Eldana Sádýaqasovanyń atap kórsetkenindeı, atalǵan zań jobasy parnıktik gazdardy shyǵarý boıynsha ákimshilik jáne qylmystyq jaýapkershilikti kúsheıtýdi, sondaı-aq ekologııalyq quqyq buzýshylyqtardy aldyn alý tájirıbesin jetildirýdi kózdeıdi.
«Parnıktik gazdarǵa arnalǵan kvotalardy bólý jáne parnıktik gazdardy shyǵarýdy qysqartý boıynsha ákimshilik baqylaý osy saladaǵy memlekettik retteýdiń negizgi tetikteri bolmaq. Kómirtegin atmosferaǵa shyǵarý kólemi Kıotto hattamasyna sáıkes Ulttyq josparda bekitiledi. Al zań buzýshylyqtan bıýdjetke túsken qarjyǵa eski tehnologııa aýystyrylyp, balamaly energııa kózderin damytý usynylyp otyr. Qazirgi kezde atmosferaǵa parnıktik gazdardy shyǵaratyn óndirister úsh topqa bólingen. Olar - jylyna 1-20 myń tonna parnıktik gazdar shyǵaratyn nysandar. Olar kvota almaıdy. Biraq jyl saıyn belgilengen tártip boıynsha aqy tóleıtin bolady», - deıdi E. Sádýaqasova.
Vıtse-mınıstr atap kórsetkendeı, QR Úkimeti Kıoto hattamasyna sáıkes, atmosferaǵa shyǵarylatyn parnıktik gazdardyń kólemin 2020 jylǵa qaraı 15 paıyzǵa, al 2050 jylǵa deıin 25 paıyzǵa tómendetý jóninde sheshim qabyldady. Bul elimizdiń osy saladaǵy ulttyq saıasatyn ázirleýge sebepshi boldy.
