Jańa zamanǵa saı Memlekettik qyzmet týraly jańa zań qabyldanatyn bolady - Q. Sultanov
Onyń sózine qaraǵanda, arnaıy jumys toby atalǵan zańnyń jobasyn jasaqtaýǵa kirisip te ketken. «Instıtýtsıonaldy 5 reformany júzege asyrýdyń «100 qadamy» baǵdarlamasynda naqty aıtylǵan: «Memlekettik qyzmet týraly jańa zań qabyldaý» dep.
Elbasynyń osyndaı tapsyrmasy bar. Buǵan bizdiń qoǵam da daıyn dep esepteımin, úkimet jáne bizdiń parlament te daıyn. Óıtkeni bizde saraptamalyq maǵlumattar jetkilikti. Mysaldar da jetkilikti. Memlekettik qyzmetkerlerdi daıyndaýda qaı jerde qandaı kemshiligimiz bar, qandaı kezeńderden biz óttik, Memlekettik qyzmet týraly zańdarda qandaı tájirıbelerden óttik - sonyń barlyǵy anyqtaldy, osy materıaldardyń barlyǵy bizderde jetkilikti.
Aldaǵy ýaqytta jańa zamanǵa, jańa talapqa saı Memlekettik qyzmet týraly jańa zań qabyldanatyn bolady. Onyń tóńireginde áli talaı áńgime bolady, ol týraly pikirtalastar bolady. Ony jumys tobynda, BAQ-ta talqylaımyz, kóptegen konferentsııalar ótkiziledi», - dedi ol.
Májilismenniń sózine qaraǵanda, zań jobasyn daıyndaý, ony qabyldaý kóp uzaqqa barmaı, taıaý jyldarda iske asady.
