Jańa vaktsınalardy engizý máselesin halyqpen talqylaǵymyz keledi - Birtanov
Mınıstrdiń sózinshe, onkologııalyq aýrýlardyń artýyna baılanysty ótken jyly engizilgen keshendi jospar alǵashqy nátıjelerin bere bastady.
«Nátıjesinde elimizde qaterli isik aýrýy erte anyqtalǵan naýqastardyń úlesi artty. Jalpy onkologııalyq aýrýdyń 50% aldyn alýǵa bolady.
Qazaqstanda jıi kezdesetin áıelderdiń jatyr moıyny qaterli isiginiń aldyn alýǵa bolady. Álemniń kóptegen elderinde papıllomadan balalardy vaktsınalaý engizilgen. Biz de bul vaktsınalaýdy engizgimiz keldi, biraq bizdiń qoǵam jańa vaktsınalardy qabyldaǵysy kelmeı, óre túregeledi. Sondyqtan da bas tartýǵa týra keldi. Sonyń saldarynan ózge elderde túbegeıli sheshilgen qaterli isikten elimizde áıelder kóz jumady. Sondyqtan, keshendi jospar aıasynda osy máseleni halyqpen keńinen talqylaǵymyz keledi», - dedi ol Astanada ótken «Deni saý adamdardyń myqty ultyn qalyptastyrý» atty paneldik sessııada.
E. Birtanov vaktsına arqyly qaterli isik aýrýlarynyń aldyn alýǵa bolatynyn jetkizdi.
«Baýyr qaterli isigi de B vırýsty gepatıtiniń saldarynan paıda bolady. Vaktsınanyń kómegimen onyń da aldyn alýǵa bolady. Bizde vaktsınalaýǵa qarajat ta, múmkindik te bar. Tek vaktsınaǵa qarsy lobbı qoǵamdy adastyryp otyr. Osylaısha, aýrýdyń aldyn almaı, em-domǵa óte kóp qarjy jumsap otyrmyz», - dep óz sózin túıindedi Eljan Birtanov.
