Jańa úılerdiń irgetasyn quıyp jatyr - Qostanaıdaǵy órtten baspanasy janyp ketken turǵyn

QOSTANAI. QazAqparat – Qostanaı oblysy Áýlıekól aýdanyndaǵy órtten zardap shekken jergilikti turǵyn qıyn sátte kómek bergen qazaqstandyqtarǵa alǵysyn bildirdi, dep habarlaıdy Qazaqparat tilshisi.

Amanqaraǵaı aýlynyń turǵyny Amanjol Ahmetovtyń aıtýynsha, qazirgi tańda tilsiz jaý saldarynan zardap tartqandarǵa arnalǵan úılerdiń irgetasy quıylyp jatyr.

«Men Amanqaraǵaı aýlyndaǵy Sývorov kóshesinde turdym. Órt kezinde kóshemiz tolyq janyp ketti. Qazirgi tańda Qazaqstannyń ár aımaǵynan gýmanıtarlyq kómek tıip jatyr. Al janyp ketken úılerdiń ornyna jańa úı salyna bastady. Mine, irgetasyn quıyp jatyr. 2-3 aıda salyp beremiz dedi. Kómek retinde mıllıon aqsha tústi. Barlyǵyna rahmet! Qazaqstannyń halqy men Úkimetine alǵysymdy bildiremin», - dedi Amanqaraǵaı aýylynyń turǵyny.

Eske salaıyq, oblystaǵy alapat órt kezinde 2 091 adam evakýatsııalanyp, 12 turǵyn túrli jaraqat alǵan. Munymen qosa, tilsiz jaý saldarynan 1935 jyly týǵan bir adam kóz jumdy.

Qostanaı oblysynyń ákimi Arhımed Muhambetovtyń málimetinshe, Áýlıekól aýdanyndaǵy ormannyń basym bóligi kúlge aınalǵan.

Qazirgi tańda zardap shekkenderge beriletin 91 úıdiń qurylysy bastalǵan. Ol úshin 2,3 mlrd teńge qarajat bólindi. Baspanalar Maqtaaraldaǵy sý tasqyny kezinde júzege asyrylǵan joba negizinde salynady.