Jańa úılerdi salǵan kezde jylý saqtaıtyn tehnologııalardy paıdalaný kerek - N.Nazarbaev
ASTANA. 12 mamyr. QazAqparat - Jańa úılerdi salǵan keze jylý saqtaıtyn tehnologııalardy paıdalaný kerek, dep atap ótti QR Prezıdenti Nursultan Nazarbaev Almatyda ótken keńes barysynda.
Bul týraly QR Prezıdentiniń baspasóz qyzmeti habarlady.
«Arzan elektr energııasyn únemsiz paıdalaný memlekettiń elektr qýatyna, jylý men sýǵa tólenetin tarıfterdi qymbattatýǵa ıtermeleıdi. Túsindirý jumystaryn ótkizip, energııany qalaı tıimdi jáne únemdi paıdalanýǵa bolatynyn kórsetý kerek», - dedi Prezıdent Almatydaǵy keńes barysynda.
«Búgingi tańda respýblıka boıynsha elektr jetkizýdi esepteıtin qurylǵylar tolyqtaı qamtylǵan. Alaıda olardyń basym bóligi moraldyq jáne fızıkalyq túrde eskirgen. Onymen qosa, elektr qýaty, sý, jylý únemsiz paıdalanylady», - delingen Memleket basshysynyń baspasóz qyzmeti taratqan aqparata.
«Qala elektr energııasy tapshylyǵyn bastan keshirýde. Elektr qýatynsyz óndirister damı almaıdy. Osyǵan baılanysty Úkimetke Almaty ákimdigimen jáne «KEGOC» AQ-men birlese otyryp, qaladaǵy SES-ke jaqyn jerden sarqyramalar salyp jáne energetıka qurylǵylaryn odan ári qaıta jańǵyrtýdan ótkizý jumystaryn jalǵastyrý qajet», - dedi Elbasy.
Prezıdenttiń atap ótkenineı, kómir, munaı jáne gaz áli de tıimsiz paıdalanylyp keledi. «Qolymyzda bar qorlar taýsylady, sondyqtan olardy únemdeýdi úırený kerek. Múmkin bolǵan jerde elektr jaryǵyn saqtaıtyn shamdardy ornatyp, olardy paıdaǵa asyrý kerek», - dedi Memleket basshysy.
«Osyndaı lampalardy paıdalanýda Qaraǵandynyń tájirıbesin esepke alý kerek, jylýdy saqtaýǵa múmkindik beretin arnaıy shyny tehnologııalary bar. Osyny da jańa qurylys salýda esepke alý kerek» - dedi Elbasy.
