Jańa ýnıversıtet elimizdegi joǵary bilimniń flagmany bola alady - Elbasy
ANA. 7 jeltoqsan. QazAqparat /Qanat Mámetqazyuly/ - «Nazarbaev Ýnıversıteti» jańa oqý orny Qazaqstandaǵy joǵary bilimniń flagmany bola alady. Búgin elordada «Nazarbaev Ýnıversıteti» stýdentteri men oqytýshy qaýymynyń aldynda dáris oqyǵan QR Prezıdenti Nursultan Nazarbaev osylaı málim etti.
«Men ásirese elordada jumys isteýge nıetin bildirgen sheteldik mamandarǵa erekshe rızashylyǵymdy bildiremin. Bul rette jańa ýnıversıtet bizdiń elimizdiń joǵary biliminiń negizgi flagmany bolyp tabylady. Sizder - onyń biregeı ári alǵashqy komandasysyzdar. Sondyqtan da, ǵylym men bilim muhıtyna enýdegi ýnıversıtettiń joly kóbinese sizderge baılanysty. Buny osyndaı keremet ýnıversıtettiń stýdentteri aldyndaǵy sizderdiń jaýapkershilikterińiz dep aıtýǵa da bolady», - dedi N. Nazarbaev.
Sonymen qatar Prezıdent ýnıversıtettiń áleýetin arttyrýǵa qoldaý bildirgenderge de rızashylyǵyn bildirdi. «Atap aıtqanda, ENRC, «Qazaqmys», «Qazkommertsbank» basshylaryna alǵys aıtamyn», -degen Elbasy vıtse-premer Ómirzaq Shókeev pen Prezıdent Іs basqarmasynyń basshysy Bolat Ótemuratovqa da rızashylyǵyn tanytty. «Meniń oıymsha, qolynan keletinderdiń bári ýnıversıtetke kómek berýleri qajet. Óıtkeni, bizdiń ýnıversıtet eldiń damýyna zor úles qosady, onyń qaıtarymy da sol. Bul belgili tájirıbe», - dedi Prezıdent.
