Ulybrıtanııa úkimeti zeınetkerlerdi áleýmettik kómekten aıyrdy
LONDON. KAZINFORM - Ulybrıtanııa úkimeti zeınetkerlerdi áleýmettik kómekten aıyrdy. Qys mezgilinde jylýǵa dep berilip kelgen járdemaqy endi tólenbeıdi, dep habarlaıdy Kazinform tilshisi.
Qarjylaı qoldaý tek óte kedeı egde jastaǵylarǵa kórsetiledi. Óıtkeni qazynada aqsha joq. Bıýdjet shyǵystary 22 mıllıard fýnt sterlıngke artyq jumsalǵan. Bul burynǵy bıliktiń qarjyny jóndi josparlaı almaýynan, deıdi jańa úkimet músheleri.
Saılaýda Konservatorlarǵa emes, Leıborısterge daýys bergeni úshin egde jastaǵy mıllıondaǵan zeınetker ókinip otyr. Olar kún salqyndaǵanda jylýǵa tólenip kelgen járdemaqynyń toqtatylatynyn estip ashýly. Sarapshylardyń boljaýynsha, jyl sońyna deıin elektr energııasynyń quny shamamen 150 fýntqa, ıaǵnı 100 myń teńgege qymbattamaq. Buǵan nalyǵan zeınetkerler qystan aman shyqpaýymyz múmkin zárezap bolyp otyr.
«Onsyz da kúnin kóre almaı otyrǵan zeınetkerlerdi járdemaqydan aıyrý úlken saıası qatelik», - deıdi zeınetkerlerdiń biri.
«Qartaıǵanda adam kedeıshiliktiń qamytyn kımeı, beınetiniń zeınetin kórýi kerek», - deıdi taǵy bir úkimetke ókpesi qara qazandaı taǵy bir zeınet demalysyndaǵy kisi.
Lıverpýlde Leıborıstik partııa konferentsııasy ótip jatqan ǵımarattyń aldyna ondaǵan adam jınaldy. Olar tólemderdiń qysqarýyna qarsy ekendikterin aıtyp, premer-mınıstrdi áreket etýge shaqyrdy. Járdemaqynyń tek óte kedeı zeınetkerlerge tólenetinine olar narazy.
«Kır Starmer, bizge qulaq asyńyz. Baılardyń salyǵyn kóbeıtip, zeınetkerlerge tıispeńiz», dep aıqaılady narazy top.
Qorǵansyzdyń kúıin keshkenderge qamqor bolatyn Kásipodaq uıymy buǵyp qalmady. Máseleni daýysqa salyp talqylady. Olardyń pikiri eshteńeni sheshpese de, úkimet basshysynyń abyroıyna nuqsan keltiretini anyq.
«Jańa úkimettiń zeınetkerlerdi járdemaqydan aıyryp, óte baı adamdarǵa qalaısha tisi batpaıtynyn túsinbeımin. Bul qate sheshim jáne onyń kúshin joıý kerek. Biz álemdegi altynshy iri ekonomıkamyz. Bizde aqsha bar. Ulybrıtanııaǵa qatań únemdeý emes, ınvestıtsııa qajet», deıdi Unite kásipodaq uıymynyń bas hatshysy Sharon Grem.
Dál osy ýaqytta premer-mınıstr, ádettegishe, burynǵy úkimetti sahnadan synaýmen boldy. Starmerdiń sózinshe, barlyq qıyndyqqa konservatorlar kináli. Olar tek óz múddelerine qyzmet etip, bıýdjetti shuryq-tesik qaldyrǵan. Óz kezeginde úkimet basshysy jarqyn bolashaq pen jańa Ulybrıtanııa qurýǵa ýáde berdi.
«Jańa úıler. Jańa qala. Aýrýhanalar men mektepterge aparatyn jańa joldar. Óskeleń urpaq úshin jarqyn bolashaq. Bunyń bári halyq ıgiligine beriledi jáne esińizde bolsyn, biz oǵan qol jetkizemiz. Ekonomıkamyzdy turaqtandyramyz, Torıdiń eski-qusqysy murasynan qutylamyz», dedi Ulybrıtanııa premer-mınıstri Kır Starmer.
Úkimettiń zeınetkerlerdi túrtkilep, baılarǵa áli kelmeıtindeı sebebi de bar. Sońǵylarynyń Leıborısterdi altynmen aptap, kúmispen qaptap qoıǵany belgili boldy. Mıllıarder demeýshi úkimet múshelerine qymbat kıimder men kózildirikter satyp alýǵa aqsha bergen. Saıasatkerlerge sońdaı-aq kontsertter men fýtbol machtaryna tegin bıletter usynǵan. Ol azdaı Kır Starmer 20 myń fýnt sterlıng kóleminde aqsha alyp, jasóspirim ulyn Kovent-Garden aýdanyndaǵy 18 mıllıon fýnt sterlıng turatyn penthaýsta ýaqytsha turǵyzǵan.
«Balamnyń emtıhannan qulap qalmaýy úshin tynysh jerde sabaqqa daıyndalýy mańyzdy boldy. Óıtkeni úıimizdiń aldynda jýrnalıster torýyldap júrdi. Ereýilge shyqqan halyq ta maza bermedi. Otbasymnyń múshelerine olardyń qaýipsizdigin qamtamasyz etemin dep ýáde berdim jáne ýádemde turdym. Aqsha maǵan tikeleı berilmedi. Páterdi jaldaýǵa tólendi», dep aqtaldy Ulybrıtanııa premer-mınıstri Kır Starmer.
Úkimet basshysynan bólek Qarjy mınıstri de dızaınerlik kıimdi syılyqqa alǵan. Onyń orynbasaryna Teılor Svıfttiń kontsertine bıletter tartý etilgen. Bilim mınıstri óziniń qyryq jasqa tolǵan týǵan kúnin uıymdastyrý úshin demeýshiden biraz aqsha alǵan. Metsenattardan barlyǵy quny júz myń fýnt sterlıngten asatyn syılyqtar qabyldanǵan.
Starmer óziniń saılaýaldy naýqany kezinde baılyǵy asyp tasyǵan qarsylastaryn shynaıy ómirden alshaqtaǵandar dep aıyptaǵany belgili. Bılikke kelgennen keıin ózi solardyń kebin kıip otyrǵandaı áser qaldyrady.
Premer partııasynyń bedeline nuqsan kelgenin moıyndamaıdy. Ol barlyq syılyqtar deklaratsııadan ótken dep aqtalady. Biraq saıasatkerdiń reıtıngisi konservatıvti kóshbasshy Rıshı Sýnakpen salystyrǵanda tómendep ketti. Kópshiliktiń synyna ushyraǵannan keıin Starmer bolashaqta syılyqtardan bas tartamyn dep ýáde berdi.
