Jańa Úkimettiń mindeti halyqtyń ál-aýqatyn kóterýge baǵyttalý kerek – «Aýyl» partııasy

ASTANA. KAZINFORM – «Aýyl» halyqtyq-demokratııalyq patrıottyq partııasynyń tóraǵasy Serik Egizbaev jańa Úkimet basshysynyń basty mindeti halyqtyń turmys deńgeıin kóterý bolý kerek degen oı aıtty.

«Endigi Úkimet birinshi, ekinshi, úshinshi kezekte halyqtyń ál-aýqatyn arttyrý kerek. Halyq tek sony kútip otyr. Ekonomıkanyń qaı salasyn damytamyz, qandaı ınvestıtsııa tartamyz degenniń bári – mehanızm. Eger halyq jan qaltasynda, dastarhanynda, balalarynyń oqý jaǵdaıy, úıdegi jaǵdaıy jaqsarǵanyn sezbese, reformalardyń oń yqpaly sezilmese, aýyldaǵy halyqtyń baǵy janbaıdy. Sondyqtan Úkimettiń aldynda turǵna mindetterdiń birinshisi de, ekinshisi de, úshinshisi de tek qana halyqtyń jaǵdaıy men ál-aýqaty dep aıta alamyn», - dedi Serik Egizbaev.

Depýtat Premer-mınıstrlikke Oljas Bektenovtiń kandıdatýrasy usynylatynyn kútpegenin aıtty.

«Qoǵamda 5-ten kem emes kandıdatýra talqylanyp jatty. Bul tulǵa ádettegideı ol tizimde bolmady. Shynymdy aıtaıyn, jeke men úshin kútpegen jaıt boldy», - dedi Májilis depýtaty. 

Aıta keteıik, búgin Oljas Bektenov Premer-Mınıstr bolyp taǵaıyndaldy.