Jańa Úkimettiń keńeıtilgen otyrysy bastaldy
ASTANA. KAZINFORM – Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy bastaldy.
Aqordanyń baspasóz qyzmeti 5 aqpanda taratqan resmı málimette keńeıtilgen otyrys Qazaqstannyń 2023 jylǵy áleýmettik-ekonomıkalyq damýy qorytyndylap, aldaǵy kezeńge arnalǵan negizgi mindetterdi aıqyndaıtyny aıtyldy.
Al Senat tóraǵasy Máýlen Áshimbaev otyrysta Úkimet jumysyna, mınıstrler qyzmetine baǵa beriletinin aıtqan.
Basshysy aýysqan Úkimettiń baǵyty qanshalyqty ózgeretini osy jıynda birshama aıqyndala túsýi kerek. Ázirge qaıta jasaqtalǵan mınıstrler kabınetinde 4 jańa esim bar.
Keshegi Májilistiń jalpy otyrysynda Memleket basshysy jańadan taǵaıyndalǵan Premer-Mınıstr Oljas Bektenovtiń komandasyna qandaı jańa mindetter júkteletinin jalpylama aıtqan edi.
Prezıdent Úkimettiń aldynda áýeli eldiń áleýmettik-ekonomıkalyq saıasatyna jańa serpin berip, tarıf saıasatyndaǵy kedergilerdi joıý, agrosektordy qaıta jandandyrý áleýmettik salany basqarý men qarjylandyrýdyń tıimdi tásilderin ázirleý sııaqty mindetter turǵanyn atap ótti.
«Erteń Úkimettiń keńeıtilgen jıyny ótedi. Sol kezde jańa quramnyń aldynda turǵan mańyzdy mindetterge tolyǵyraq toqtalamyn», - dedi Prezıdent.
Jalpy búgingi otyrystyń ótetini alǵash ret Memleket basshysynyń Egemen Qazaqstan gazetine bergen suhbatynda aıtylǵan bolatyn.
