Jańa Úkimet mańyzdy sheshimderdi shuǵyl qabyldaýy kerek — Toqaev

ASTANA. KAZINFORM — Prezıdent Qasym-Jomart Toqaev Májilistiń jalpy otyrysynda jańadan jasaqtalatyn Úkimetke jańa qarqynmen jumys isteý qajet ekenin aıtty.

«Aldymen elimizdiń áleýmettik-ekonomıkalyq saıasatyna jańa serpin berý kerek. ıAǵnı, ekonomıkanyń barlyq salasyn damytý, yntalandyrý joldary men aldyn ala mindetterdi qaıta qaraý qajet. Túptep kelgende, memleket endi úzdiksiz qoldaý sharalarynan naǵyz sapaly damýǵa qolǵabys etý isine túbegeıli kóshý kerek. Bul jumysty sóz júzinde emes, is júzinde oryndaıtyn ýaqyt jetti. Osylaısha biz ozyq damý jolyna túsip, ulttyq ekonomıkany shyn máninde jańa deńgeıge shyǵaramyz. Qazir elimizdiń salyq jáne bıýdjet kodeksteri memlekettik satyp alý jáne memleket pen jeke menshik áriptestigi týraly zańnamalar múlde jańasha sıpatqa ıe boldy. Sonyń bári men jarııalaǵan jańa ekonomıkalyq saıasatty júzege asyrýdyń myqty tiregi bolýǵa tıis», — dedi Qasym-Jomart Toqaev.

Prezıdent jańa Úkimet shuǵyl sheshýge tıis negizgi sharýalardyń birqataryna toqtaldy.

«Sonymen qatar, aldymyzda tarıf saıasatyndaǵy kedergilerdi joıý, agrosektordy qaıta jandandyrý áleýmettik salany basqarý men qarjylandyrýdyń tıimdi tásilderin ázirleý mindeti tur. Bul jerde, árıne, eń aldymen Úkimet mańyzdy ról atqarýǵa tıis. Jańa qarqynmen jumys isteý qajet. Mańyzdy sheshimderdi shuǵyl qabyldap, kóp sozbaı sheshýshi qadamdardy jasaý kerek», — dedi Memleket basshysy.

Aıta keteıik, keshe Memleket basshysy Úkimetti otstavkaǵa jiberdi.

Prezıdent keńesshisi — baspasóz hatshysy Berik Ýálı Úkimet basshysyn taǵaıyndaý rásimin túsindirdi.

Búgin elimizdiń jańa Premer-Mınıstri taǵaıyndaldy.