Jańa Úkimettiń múshelerin taǵaıyndaý týraly másele kelesi aptanyń ishinde sheshiletin bolady-Elbasy
ASTANA. 8 sáýir. QazAqparat /Aıdar Ospanalıev/ - Jańa Úkimettiń múshelerin taǵaıyndaý týraly másele kelesi aptanyń ishinde sheshiletin bolady. Búgin QR Parlamenti Májilisinde palata depýtattary QR Premer-Mınıstri laýazymyna Kárim Másimovty taǵaıyndaýǵa kelisimin bergennen keıin sóılegen sózinde Elbasy Nursultan Nazarbaev osylaı aıtty.
«Árıne, qazirgi ýaqytta kimdi jáne qaıda taǵaıyndaıdy eken degen áńgime júrýde. Kelesi aptanyń ishinde biz bul máselelerdi sheshemiz dep oılaımyn», - dedi Prezıdent.
Memleket basshysy memlekettiń aldynda aýqymdy mindetter turǵandyǵyn, ony sheshý úshin eldiń yntymaǵy men birligi qajet ekendigin qadap aıtty. Prezıdent eldiń birligi memlekettik bıliktiń birliginen bastalatyndyǵyn atap kórsetti. Sondyqtan bıliktiń barlyq tarmaǵy ózara kelise otyryp jumys isteýleri tıis.
Aıta keteıik, búgin Astanadaǵy Táýelsizdik saraıynda 2011 jyldyń 3 sáýirinde ótken QR Prezıdentiniń kezekten tys saılaýynda jańa merzimge qaıta saılanǵan Prezıdent Nursultan Nazarbaevty ulyqtaý rásimi ótip, Elbasy Qazaqstan halqynyń aldynda ant qabyldap, prezıdenttik qyzmetine resmı kiristi. Sodan keıin Úkimettiń shuǵyl otyrysy ótip, onyń barynda QR Konstıtýtsııasynyń 70-babynyń 1-tarmaǵyna sáıkes Kárim Másimov basqarǵan Qazaqstannyń jetinshi Úkimeti jańadan saılanǵan Qazaqstan Respýblıkasy Prezıdentiniń aldynda óz ókilettigin doǵardy.
Al tústen keıin Astanada ótken QR Parlamenti Májilisiniń jalpy otyrysynda Memleket basshysy Nursultan Nazarbaev Qazaqstan Respýblıkasynyń Premer-Mınıstri laýazymyna taǵy da Kárim Másimovtyń kandıdatýrasyn usyndy.
«Oılanyp-tolǵanyp, men sizderden Kárim Másimovty Premer-Mınıstr etip taǵaıyndaýǵa kelisimderińizdi berýdi ótinemin», - dedi N. Nazarbaev jalpy otyrysta depýtattarǵa qaratyp aıtqan sózinde.
Elbasy osy jyldar ishinde aldyńǵy Úkimettiń quramy men Parlament qoıan-qoltyq jumys istegenin, sol kezeńde kúrdeli daǵdarysty jaǵdaılar bolǵandyǵyn, memleket ol qıyndyqtardy eńsergendigin atap kórsetti. "Ekinshi jaǵynan biz ındýstrııalyq baǵdarlamany júzege asyrýdamyz. Álemde eshkim de ótken daǵdarysty qaıtadan qaıtalanbaıdy dep esepteı almaıdy. Osyǵan baılanysty jáne Premer-Mınıstrdiń ózi Parlamentpen tyǵyz jumys istegendikten Kárim Másimovtyń kandıdatýrasyn qoldaýdy suraımyn», dedi N. Nazarbaev.
Elbasy aldyńǵy Úkimet «bir jaǵadan, bir jeńnen qol» shyǵaryp jumys istegendigin atap kórsetti. «Búgingi kún úshin jáne Úkimettiń tıimdi jumys isteýi úshin osy kandıdatýrany barynsha qolaıly dep bilemin», - dedi N. Nazarbaev.
Prezıdenttiń pikirinshe, Kárim Másimov Úkimet basshysy laýazymynda ózin aldyǵa qoıylǵan mindetterdi oryndaı alatyn, áriptesteriniń yntymaqty jumysyn uıymdastyra biletin kásibı adam retinde kórsete aldy. Prezıdent Kárim Másimovke Úkimettiń aldyńǵy quramy ázirlegen baǵdarlamalardy júzege asyrýdy júktegenin atap kórsetti.
Sodan keıin Májilis depýtattary Qazaqstan Respýblıkasynyń Premer-Mınıstri laýazymyna Memleket basshysy Nursultan Nazarbaev usynǵan Kárim Másimovtyń kandıdatýrasyn biraýyzdan qoldap, daýys berdi.
Sol jerde Memleket basshysy Nursultan Nazarbaev Kárim Másimovti QR Premer-Mınıstri etip taǵaıyndaý týraly Jarlyqqa qol qoıdy.
