Jańa Úkimet bıýdjetten bólinetin árbir tıyndy qadaǵalaýy tıis - sarapshy

ASTANA. QazAqparat - QR Prezıdenti janyndaǵy Qazaqstannyń Strategııalyq zertteýler ınstıtýtynyń bólim basshysy Alýa Joldybalına qaıta jasaqtalǵan QR Úkimeti týraly pikir bildirdi, dep habarlaıdy QazAqparat tilshisi.

Sarapshy 11-shi Úkimet basshysy bolyp taǵaıyndalǵan Asqar Mamınniń tájirıbeli menedjer ekenin atap ótti.

«Bul qyzmetke Premer-Mınıstrdiń ýaqytsha mindetin atqarýshy Asqar Mamınniń taǵaıyndalatyny alǵashqy kúnderi-aq boljanǵan edi. Árıne, bul rette Mamınniń ulttyq kompanııalardaǵy, vıtse-premer retindegi tájirıbesi eskerildi. Eń aldymen bul kisi - tájirıbesi mol bilikti menedjer», - dedi A. Joldybalına.

Onyń aıtýynsha, aldyńǵy Úkimettiń aldyna ındýstrıalızatsııa, ekonomıka, bes ınstıtýtsıonaldy refomrany júzege asyrý, zańnamalar daıyndaý mindetteri qoıylsa, jańa Úkimetke múldem basqa tapsyrmalar beriledi.

«Búgingi jańa Úkimettiń eń úlken mindeti - eldegi áleýmettik jaǵdaıdy qalpyna keltirý, áleýmettik qorǵalmaǵan toptarǵa jaǵdaı jasap, olardyń qorǵalýyna baǵyttalǵan baǵdarlamalardyń tıimdi jumys isteýin qamtamasyz etý. Taǵy bir mańyzdy mindeti - jumsalatyn qarjyny tıimdi qoldaný jáne oǵan baqylaý ornatý. ıAǵnı, bıýdjetten bólinetin árbir tıyn, árbir qarjyǵa bul Úkimet muqııat jaýap berýi tıis jáne qadaǵalaýy tıis», - dep óz sózin tolyqtyrdy sarapshy.

Ásirese, kópbalaly analar men áleýmettik jaǵdaıy tómen toptardyń qorǵalýy, jumyspen qamtý máselesin sheshý mindeti Qazaqstanda ǵana emes, álemdik saıasatta aldyńǵy orynǵa qoıylyp otyr.

«Bul - álemdik trend. ıAǵnı, jańa Úkimettiń taǵy bir atqarar mindeti - adamı kapıtaldy damytý. Qazaqstandaǵy bilim, densaýlyq saqtaý, áleýmettik qorǵaý salasyn jańa deńgeıge shyǵaryp, ol salada qabyldanǵan barlyq baǵdarlamalardy júzege asyrýda tıimdi jumys isteýi qajet bolady», - dedi Alýa Joldybalına.