Jańa Úkimet aldynda aýqymdy mindetter tur
Jańa quram degenmen, Úkimette aıtarlyqtaı ózgeris bola qoıǵan joq. Ony jańa basshynyń ózi de aıtyp ótti. Sondaı-aq, bulaı bolýynyń bir sebebi, qazirgi Úkimet múshelerine Elbasynyń senimdiliginde, deıdi Premer-Mınıstr. Bizdiń bárimizge kórsetken úlken senimi dep qabyldaýymyz kerek. Sondyqtan Úkimet músheleriniń atynan jáne jeke ózimniń atymnan Elbasyna kórsetip otyrǵan qoldaýy men senimi úshin alǵys aıtqym keledi, dedi B.Saǵyntaev. Odan soń Úkimettiń jańa múshelerin qysqasha tanystyryp, birden negizgi máselege kóshti. Keńeıtilgen otyrystaǵy Elbasy bergen tapsyrmalarǵa taǵy bir toqtalyp, naqtylaı tústi.
Osy tapsyrmalar úshin suranys qatań bolady. Onyń barlyǵy belgilengen merzimde jáne sapaly oryndalýy tıis. Sondyqtan bárimizdi qaýyrt jumys kútip tur. Elbasymen birge baratyn saparlar bolmasa, búkil sheteldik saparlardy jyldyń sońyna deıin qoıa turý qajet. Asa bir qajettilik týyndaı qalsa, onda meniń jeke ókimimmen shyǵasyzdar. Elimizdiń óńirlerine jasaıtyn saparlarǵa da kelisip barasyzdar. Sizder Úkimet tarapynan qandaı sheshimder kerek, tez arada anyqtap, usynys engizińizder. Biz qabyldaǵan sheshimder qarapaıym xalyqqa túsinikti bolýy tıis. Bizdiń kez kelgen sheshimimiz jurtshylyqqa tez arada jetip, maqsat-mindetterdi únemi túsindirip otyrýy qajet, dedi Úkimet basshysy.
Elbasynyń tapsyrmasyna sáıkes Úkimet aldynda turǵan mańyzdy mindetterdiń biri halyqty baspanamen qamtamasyz etýdiń keshendi qadamy retinde «Nurly jer» baǵdarlamasyn ázirleý bolatyn. Osyǵan baılanysty Ulttyq ekonomıka mınıstrligine oblys ákim¬derimen, múddeli memlekettik organdar jáne ulttyq kompanııalarmen birlese otyryp, «Nurly jer» biryńǵaı turǵyn úı qurylysy baǵdarlamasyn ázirleý tapsyryldy.
Atalǵan baǵdarlamaǵa qoldanystaǵy baǵdarlamalardaǵy baspanaǵa qatysty máselelerdiń barlyǵy shoǵyrlanady. Bul rette Úkimet basshysy Aýyl sharýashylyǵy mınıstrligine qoldanysta bar jer qoryna tıisti saraptama júrgizýdi, al óńir ákimderine bas josparlarynyń ózgerýine qatysty tıisti usynystar joldaýdy tapsyrdy. Bul jańa baǵdarlamanyń áleýmettik mańyzdylyǵy joǵary. Sondyqtan ony qoǵam múshelerimen tııanaqty talqylaý kerektigi aıtyldy.
Memleket basshysynyń Úkimetke júktegen taǵy bir tapsyrmasy aǵymdaǵy jylǵy bıýdjetti naqtylaý. Bul rette, Elbasynyń tapsyrmalaryn júzege asyrý úshin Úkimet bıýdjette tıisti qarjy shyǵyndarynyń aldaǵy úsh jyldyq bıýdjette qamtamasyz etilýin qadaǵalaıdy. Sondaı-aq, Úkimet AÓK boıynsha jańa mindetterdi qolǵa almaq.
Osy oraıda, Premer-Mınıstr Aýyl sharýashylyǵy mınıstrligine eldiń qanshalyqty ınfraqurylymdarmen qamtamasyz etilgenin anyqtaýdy, Ulttyq ekonomıka mınıstrligimen jáne ákimdiktermen birlese otyryp, tıisti sharalardy qabyldaýdy tapsyrdy. Osy máselelerdiń sheshilýi AÓK-ti damytýdyń jańa memlekettik baǵdarlamasynyń negizine enedi. Premer-Mınıstr sonymen qatar, Investıtsııalar jáne damý mınıstrligine, Ulttyq ekonomıka mınıstrligine kóliktik ınfraqurylymdar boıynsha jobalardy júzege asyrýdy jyldamdatýdy júktedi.
Úkimet basshysy eldegi ınflıatsııa kólemin tómendetý tapsyrylǵanyn da eske sala ketti. Ulttyq ekonomıka mınıstrligine bıyl aımaq ákimderimen birge baǵalardyń turaqtylyǵyn qamtamasyz etýdi jáne tabıǵı monopolııalar qyzmetiniń tarıfterin ósirmeýdi tapsyramyn, dedi B.Saǵyntaev. Sonymen qatar, bıznesti qoldaý quraldaryn odan ári jetildirý jáne memlekettik-je¬ke¬menshik seriktestik qoldaný tetikterin engizý boıynsha tapsyrmalar berildi.
