Jańa týrıstik aımaq: Qara shatqaldaǵy aspaly shyny kópir qashan qoldanysqa beriledi

QONAEV. KAZINFORM – Almaty oblysynda ornalasqan Qara shatqal jańa týrıstik ortalyqqa aınalmaq. Bul týraly óńirlik kommýnıkatsııalar qyzmetinde Kegen aýdany ákimi Tańat Aıdarbekov aıtty.

Qara shatqaldaǵy aspaly áınek kópirdiń jańa eskızi tanystyryldy
Foto: Almaty oblysy ákimdigi

Aýdan ákimi «ASK Capital» JShS bastamasymen Qara shatqal týrıstik aımaǵynda aspaly shyny kópir salynyp jatqanyn aıtty.

Onyń sózinshe, qazir shatqalda tirek qadalaryna arnalǵan 16 armatýralyq qańqa daıyndalǵan. Endi tereńdigi 25 metr bolatyn 16 qadany ornatý úshin burǵylaý jumystary júrgizilip jatyr. Kelesi kezeńde tirekterdń ornatý, betondaý jáne kópir konstrýktsııalaryn montajdaý josparlanǵan. Jobanyń jalpy quny - 1,5 mlrd teńge.

- Joba tolyq iske qosylǵan jaǵdaıda jylyna 400–600 myń týrısti qabyldaý múmkindigi bolady. Aspaly kópirdiń qurylysyn 2026 jyldyń IV toqsanynda, al oǵan irgeles ózge nysandardyń qurylysyn 2027 jyldyń birinshi jarty jyldyǵynda aıaqtaý josparlanyp otyr, - dedi Tańat Aıdarbekov.

Odan bólek aýdan ákimi munda «Qara shatqal» JShS týrıstik aımaq qurý jobasyn iske asyryp jatqanyn atap ótti. Qazirgi ýaqytta týrıstik nysan aýmaǵynda tamaqtaný orny, fotoalań, átkenshek jáne shatqaldy tamashalaýǵa arnalǵan arnaıy kórý alańdary paıdalanýǵa berilgen. Búginge deıin jobaǵa 300 mln teńge ınvestıtsııa salynsa, túbeıgeli jobanyń ınvestıtsııalyq kólemi 1 mlrd teńgege jetedi.

Eske salaıyq, 2026 jyldyń basynda Qara shatqaldaǵy aspaly áınek kópirdiń jańa eskızi tanystyryldy.

170 metrlik áınek kópirdiń jobasy 2024 jyly tanystyrylǵan bolatyn.

Joba menedjeri Manap Taǵaevtyń aıtýynsha, kópirde bir mezette 3 myń adam júre alatyn bolady. Kópirdiń negizi berik trıpleks áınekten jasalsa, al búkil konstrýktsııasy tolyqtaı jınalmaly bolady. Barlyq elementter daıyn kúıinde qurylys ornyna jetkizilip, dánekerleý jumystarynsyz qurastyrylady.