Jańa týrıstik aımaq: Qara shatqaldaǵy aspaly áınek kópirdiń jobasy qaı satyda

QONAEV. KAZINFORM – Almaty oblysynyń Kegen aýdanynda jańa týrıstik aımaq paıda bolady.

Byltyr qarasha aıynda oblystaǵy Qara shatqalǵa áınek kópir salynatyny belgili boldy. Kazinform tilshisi 9 aıdan keıin ınvestıtsııalyq jobanyń qanshalyqty alǵa jyljyǵanyn anyqtady.

Kegen aýdany ákimdiginiń málimetinshe, "ASK Capital" JShS qara kanonnyń aýmaǵynda aspaly shyny kópir salýdy josparlap otyr. Qazirgi ýaqytta avtokólik turaǵyna arnalǵan alańdy tegisteý jumystary júrgizilip jatyr.

- Jobanyń jalpy quny - 1,5 mıllıard teńge. Investordyń óz qarajaty esebinen qarjylandyrylady. 2024 jyly Almaty oblysy ákimdiginiń qoldaýymen «Qara shatqal» týrıstik aımaǵyn damytý úshin elektr jelisin tartýǵa aýdan qarajaty esebinen 57 mln teńge bólinip, jeliler iske qosyldy, - delingen aýdan ákimdiginiń jaýabynda.

Aspaly áınek kópirdiń qurylysy boıynsha joba menedjeri Manap Taǵaev ta aıtyp berdi. Onyń sózinshe, biregeı kópirdiń uzyndyǵy 210 metr, eni 2 metr (qorshaýlarymen qosa 3 metr) bolady. Joba ishki jáne syrtqy týrızmdi damytýǵa, sondaı-aq óńirdiń mádenı murasyn saqtaýǵa baǵyttalǵan.

- Kópirdiń negizi berik trıpleks áınekten jasalsa, al búkil konstrýktsııasy tolyqtaı jınalmaly bolady. ıAǵnı, barlyq elementter daıyn kúıinde qurylys ornyna jetkizilip, dánekerleý jumystarynsyz qurastyrylady. Joba 100% jeke qarajat esebinen júzege asyrylyp jatyr, al qurylysqa arnalǵan jer telimi bizdiń kompanııa tarapynan jeke tulǵadan satyp alyndy, - dedi ol.

Kópirde bir mezette 3 myń adam júre alatyn bolady. Manap Taǵaev nysan osy syıymdylyq pen júktemeni eskere otyryp eseptelgenin atap ótti. Aıtýynsha, adamdardyń yńǵaılylyǵy úshin kanondy tamashalaýǵa arnalǵan eki baqylaý alańy jasalady.

- Qarsy bette kópirden ótken soń týrıstik aımaq qurylady. Onda qazaqtyń ulttyq ashanasy bar meıramhana, baggı, kvadrotsıkl jáne mototsıkl (endýro) trassalary, atpen serýendeý jáne «Kókpar» oıynyn ótkizýge arnalǵan ıppodrom, balalarǵa arnalǵan taqyryptyq park jáne qonaqúı úıler bolady. Týrısterdi dástúrli turmyspen tanystyrýǵa arnalǵan kıiz úılerden etno-qalashyq qurylady, - dedi joba menedjeri.

Eske salaıyq, buǵan deıin Almaty oblysynda Kóshpendiler qalashyǵyna jol salynyp jatqanyn jazǵanbyz.