Jańa týǵan sábılerge aýdıometrııalyq tekseris júrgizildi
ASTANA. 1 cáýir. QazAqparat /Aınur Kenebaeva/ - Ana men bala densaýlyǵyn jaqsartý maqsatynda Astana qalasynyń medıtsınalyq mekemelerinde sábıler men reprýdıktıvti jastaǵy áıelderge skrınıngti tekserýler júrgizilýde.
Áleýmettik mańyzy bar aýrýlardyń aldyn alý aıasynda qala emhanalarynda, perzenthanalarda, qalalyq onkologııalyq dıspanserde arterıaldyq gıpertonııanyń aldyn alý, glıýkometrııamen qandaǵy qant deńgeıin, glaýkomany anyqtaý maqsatyndaǵy dárigerlik tekserister ótkizilip jatyr.
Búgin qalalyq №1 perzenthanada jańa týǵan sábılerge aýdıometrııa tekserisin ótkizý boıynsha ashyq esik kúnderi ótip jatyr.
«Aýdıometrııalyq tekseris erte jastan balalardyń estý qabiletin tekserý, týa bitken jáne tuqym qýalaıtyn patologııalardy anyqtaý men aldyn alý arqyly der kezinde dárigerlik kómek kórsetý úshin uıymdastyrylady. Der kezinde jasalǵan tekseris pen ýaqytyly emdeý keı jaǵdaılarda estý qabiletin qalypqa keltirýge septigin tıgizedi» , - dedi №1 perzenthana bas dárigeriniń orynbasary Halıma Sharıpova.
Halıma Sharıpovanyń málimdeýinshe, osyndaı ashyq esik kúnderi perzenthanada eki apta buryn ótkizilip, analarynyń kelisimi boıynsha 12 balaǵa aýdıometrııalyq tekseris júrgizilgen bolatyn.
Áleýmettik mańyzy bar aýrýlardyń aldyn alý aıasyndaǵy skrınıngti zertteýler áli de jalǵaspaq.
