Jańa tirkelgen mıkroqarjy uıymy men lombardtar agenttikke birden habarlamasa aıyppul tóleıdi
ASTANA. KAZINFORM — Qarjy naryǵyn retteý jáne damytý agenttigi mıkroqarjylyq qyzmetti júzege asyratyn uıymdarǵa qatysty ákimshilik jaýapkershilikti kúsheıtpekshi. Bul týraly agenttiktiń baspasóz qyzmeti málim etti.
— Qarjy qyzmetterin tutynýshylardyń quqyqtaryn qorǵaý maqsatynda Qazaqstan Respýblıkasy Qarjy naryǵyn retteý jáne damytý agenttigi mıkroqarjy qyzmetin júzege asyratyn uıymdardyń (MQQJU) ákimshilik jaýapkershiligin kúsheıtý boıynsha birqatar sharalardy qabyldady, — delingen habarlamada.
Bıylǵy jyly 10 qańtarda qabyldanǵan «Qazaqstan Respýblıkasynyń Ákimshilik quqyq buzýshylyq týraly kodeksine (ÁQtK) ózgerister men tolyqtyrýlar engizý týraly» QR Zańyna mynadaı tıisti ózgerister engizildi:
— mıkrokredıt boıynsha syıaqynyń shamalary týraly aqparatty qamtıtyn jarnamany taratý jáne ornalastyrý kezinde jyldyq tıimdi syıaqy mólsherlemesiniń kólemin kórsetpegeni nemese durys kórsetpegeni úshin MQQJU-ǵa 50 AEK mólsherinde ákimshilik aıyppul qoldanylady;
— mıkroqarjy uıymy, kredıttik seriktestik nemese lombard retinde tirkelgeni týraly Agenttikke habarlamaǵany ne ýaqtyly habarlamaǵany úshin 20 AEK-ten 40 AEK-ke deıingi mólsherinde aıyppul belgilene otyryp, MQQJU-nyń jaýapkershiligi engizildi.
ÁQtK-niń 211-babyna kórsetilgen ózgerister 2025 jylǵy 13 naýryzda qoldanysqa engizildi.
Aıta keteıik, buǵan deıin Qarjy naryǵyn retteý jáne damytý agenttigi qarjy uıymdaryna talapty kúsheıtetinin jazǵan edik.