«Jańa tolqyn - 2015» baıqaýynyń júldegeri ánshi Ádemi jeke albomyn shyǵarmaq
ASTANA. QazAqparat - «Jańa tolqyn - 2015» («Novaıa volna») baıqaýynyń júldegeri ánshi Ádemi keler jyldyń basynda óziniń jeke albomyn shyǵarmaq. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte ánshiniń mýzykalyq prodıýsseri Rınat Ǵaısın málim etti.
«Bul ánshiniń sońǵy baıqaýy emes. Bir jyldaı demalys alatyn bolamyz, ony Ádemi ózi sheshedi. Jaqyn arada ádeminiń shyǵarmashylyq albomyna kiristik. Al keler jyldyń basynda jeke albomy jaryq kóredi», - dedi R.Ǵaısın.
Sonymen qatar, onyń atap ótýinshe, Ádeminiń bir qazaqsha jáne bir oryssha ánine Jańa jylǵa deıin beıneklıp túsirý máselesi pysyqtalý ústinde.
«Ádeminiń aldaǵy ýaqytta mejelep otyrǵan negizgi josparlary osylar. Al ázirshe, baıqaýdan keıingi demalysta», - dedi ánshiniń mýzykalyq prodıýsseri.
Aıta keteıik, Sochı qalasynda ótken Halyqaralyq «Jańa tolqyn - 2015» baıqaýyna qatysqan qazaqstandyq ánshi Ádemi ekinshi oryndy jeńip alǵan bolatyn.
